Թերևս զարմանալի չէ, որ հավկիթն ամենասննդարար մթերքներից մեկն է համարվում․ մեծ չափսի մեկ եփած հավկիթը պարունակում է վիտամին A-ի օրական նորմայի 8%-ը, ֆոլատի 6%-ը, վիտամին B5-ի 14%-ը, վիտամին B12-ի 23%-ը, վիտամին B2-ի 20%-ը, ֆոսֆորի 7%-ը, սելենի 28%-ը։
Հավկիթը նաև բավականին հարուստ է D, E, B6 վիտամիններով, կալցիումով, ցինկով և այլ սննդանյութերով։ Գյուղական պայմաններում բուծված հավերի ածած հավկիթները նաև օմեգա-3 ճարպաթթուների լավ աղբյուր են։
Ինչպե՞ս է հավկիթի օգտագործումը նպաստում առողջությանը
- Հավկիթը բարձրացնում է այսպես կոչված լավ խոլեսթերինի կամ բարձր խտության լիպոպրոտեինների մակարդակն արյան մեջ։ Իսկ բարձր խտության լիպոպրոտեինների բավարար մակարդակը նպաստում է սիրտ-անոթային հիվանդությունների, կաթվածի և այլ հիվանդությունների կանխարգելմանը։
Հավկիթների բաղադրությունը կարող է տարբերվել՝ կախված հավերի պահման ու կերակրման պայմաններից։ Գյուղական պայմաններում բուծված հավերի ածած հավկիթները հարուստ են օմեգա-3 ճարպաթթուներով, որոնք նույնպես կարևոր դեր ունեն սիրտ-անոթային հիվանդությունների կանխարգելման հարցում, քանի որ նվազեցնում են արյան մեջ եռգլիցերիդների մակարդակը։
- Հավկիթը հարուստ է խոլինով․ մեկ հավկիթի կազմում այն կարող է գերազանցել 100 մգ-ն։
Խոլինը B խմբի վիտամինների շարքին դասվող կարևոր սննդանյութ է, որն անհրաժեշտ է բջջաթաղանթների ստեղծման համար և մասնակցում է գլխուղեղի ազդանշանային մոլեկուլների արտադրության և մի շարք այլ գործընթացներին։
Կարդացեք նաև
- Հավկիթը պարունակում են լյուտեին ու զեաքսանտին հակաօքսիդանտները, որոնք շատ օգտակար են աչքերի առողջության համար, քանի որ հակազդում են դեգեներատիվ որոշ գործընթացներին, որոնք հիմնականում կապված են տարիքային փոփոխությունների հետ։
Այս հակաօքսիդանտները կուտակվում են աչքերի ցանցաթաղանթում, և, ինչպես ցույց են տալիս հետազոտությունները, բավարար քանակով օգտագործվելու դեպքում նշանակալիորեն նվազեցնում են կատարակտի և տարիքային մակուլյար դեգեներացիայի զարգացման վտանգը։
Հավկիթն օգտակար է աչքերի առողջության համար նաև վիտամին A-ի պարունակության շնորհիվ, որի անբավարարությունը տեսողության խանգարման պատճառ կարող է դառնալ։
- Հավկիթը բոլոր անփոխարինելի ամինաթթուներով հարուստ սպիտակուցների լավ աղբյուր է։ Սպիտակուցները համարվում են մարդու օրգանիզմի հիմնական շինանյութը․ ահա թե ինչու է կարևոր սննդի միջոցով բավարար քանակությամբ սպիտակուցներ ստանալը։
Մեծ չափսի մեկ հավկիթը մոտավորապես 6 գրամ սպիտակուց է պարունակում՝ ընդ որում, բոլոր անհրաժեշտ ամինաթթուներով և դրանց ճիշտ հարաբերակցությամբ։
Պատրաստեց Մարինե ԱԼԵՔՍԱՆՅԱՆԸ
