Aravot.am-ը շարունակում է նամակներ ստանալ ուսանողներից, որոնք հետաքրքրված են «Հայաստանի Հանրապետությունում հավատարմագրված բարձրագույն ուսումնական հաստատությունների առկա ուսուցմամբ մագիստրատուրայի, ասպիրանտուրայի և օրդինատուրայի մասնագիտությունների ցանկը հաստատելու մասին» նախագծի հաստատմամբ, ինչը հնարավորություն կտա եկամտահարկից փոխհատուցել առկա ուսուցմամբ սովորող ուսանողների ուսման վարձը: Ըստ օրենքի՝ վերադարձման ենթակա եկամտային հարկի գումարը կհաշվարկվի 2020-ի սեպտեմբերի 1-ից: Օրենքի դրույթը տարածվելու է նաեւ հավատարմագրում անցած ոչ պետական բուհերի վրա:
ՀՀ ԿԳՄՍ նախարարության լրատվականից Aravot.am-ին տեղեկացրին, որ այժմ նախագիծը շրջանառվում է, վերջնաժամկետը մինչեւ հուլիսի 3-ն է, բայց չի բացառվում, որ ավելի շուտ հստակ լինի ՀՀ-ում հավատարմագրված բուհերի առկա ուսուցմամբ մագիստրատուրայի մասնագիտությունների ցանկը ՝ ՀՀ Հարկային օրենսգրքի 160-1ին հոդվածի կիրառության իմաստով: Ըստ օրենքի՝ վերադարձման ենթակա եկամտային հարկի գումարը կհաշվարկվի 2020-ի սեպտեմբերի 1-ից: Օրենքի դրույթը տարածվելու է նաեւ հավատարմագրում անցած ոչ պետական բուհերի վրա:
Ըստ նախագծի, ի թիվս այլնի, այդ ցանկում են կրթական գիտությունները, հումանիտար գիտություններն ու արվեստը, կրոնագիտությունն ու աստվածաբանությունը, պատմությունն ու հնագիտությունը, բանասիրությունը, տնտեսագիտությունը, քաղաքագիտությունը, հաշվապահությունն ու հարկային գործը, շուկայագիտությունը, շրջակա միջավայրի գիտությունները, ինֆորմատիկան եւ հաշվողական տեխնիկան, առողջապահությունն ու սոցիալական աշխատանքը:
Գոհար ՀԱԿՈԲՅԱՆ
