Շիրակի մարզում գրանցվել է կորոնավիրուսից մահվան 39 դեպք։ Ամենավերջին մահացածը կրտսեր բուժաշխատող է՝ ծնված 1960 թվականին։ Նա մահացել է մայրաքաղաքում, սա առաջին դեպքն է, որ վիրուսից Շիրակի մարզի բուժաշխատող է մահանում։
Այս մասին Aravot.am-ի հետ զրույցում ասաց Շիրակի մարզպետարանի առողջապահության և սոցիալական ապահովության վարչության պետի ժ/պ Լեյլի Ասլանյանը։
Վարակի օջախն աշխատավայրը չի եղել․ աշխատավայրում վարակման դեպքեր չեն արձանագրվել, բուժաշխատողը վատ է զգացել, նմուշառվել է, տեղափոխվել մայրաքաղաք, որտեղ և մահացել է, ունեցել է նաև ուղեկցող հիվանդություններ։
Մեր տեղեկություններով, նա աշխատում էր Գյումրու հոգեկան առողջության կենտրոնում, այստեղ վարակման դեպքեր չկան․ այստեղի աշխատակիցներն աշխատանքի մտնելուց առաջ պարտադիր նմուշառվում են։
Կարդացեք նաև
Նշենք, որ այսօր Գյումրու ինֆեկցիոնում 3-ով ավելացավ կորոնավիրուսով վարակվածների թիվը․ երկու օր առաջ 38 հոգի էին, այսօր դարձան 41։ Ավելացավ նաև տնային մեկուսացման ցուցում ունեցող քաղաքացիների թիվը․ երկու օր առաջ 475 քաղաքացի էին, որոնցից 106-ի մոտ կար դրական ախտորոշում՝ հիվանդության անախտանիշ ընթացքով, այսօր դարձան 517, որոնցից 101-ի մոտ կա դրական ախտորոշում՝ հիվանդության անախտանիշ ընթացքով։
Նունե ԱՐԵՎՇԱՏՅԱՆ
