Կորոնավիրուսի ու փակ ճանապարհների պատճառով Ռուսաստանի դաշնություն մեկնել չկարողացող քաղաքացիներն այսօր էլ ավտոերթով են արտահայտում իրենց բողոքն՝ ընդդեմ Հայաստանի կառավարության: Նրանք ավտոմեքենաների ազդանշանները միացրած անցնում էին Երեւանի կենտրոնական՝ Տիգրան Մեծ փողոցով, Մաշտոցի պողոտայով, Գրիգոր Լուսավորիչ եւ այլ փողոցներով: Ավտոերթի մասնակիցների վերջին կանգառը կառավարությունն է:
Հիշեցնենք, որ արդեն որերորդ անգամ հազարից ավել քաղաքացիներ բողոքի ցույց են անում կառավարության, Ազգային ժողովի դիմաց՝ ՀՀ կառավարությունից պահանջելով բանակցել Ռուսաստանի, Վրաստանի իշխանությունների հետ՝ ճանապարհը բացելու: Նրանք արտակարգ դրությունից առաջ եկել են Հայաստան եւ այլեւս չեն կարողանում վերադառնալ:
Ցույցի մասնակիցների խոսքով, ընտանիքները վեց ամիս է՝ բաժանված են, մարդիկ ապրելու հնարավորություն չունեն, ոմանք բիզնես ու վարկեր ունեն, դպրոցահասակ երեխաներ, սակայն չեն կարողանում մեկնել Ռուսաստանի Դաշնություն:
Ցույցի մասնակիցները նշեցին, որ իրենց հարցին որեւէ իրական պատասխան կամ լուծում չի տրվում:
Լուսինե ԲՈՒԴԱՂՅԱՆ
