Կորոնավիրուսի պատճառով Հայաստանից ՌԴ մեկնել չկարողացող քաղաքացիներն այսօր կրկին կառավարության առաջ բողոքի ցույց էին անում։ Նրանք պահանջում էին հստակ ժամկետներ ասել` երբ կարող են մեկնել։
«Վեց ամիս է` էսօր-էգուց են անում։ Էսքան մարդու գործը, տուն-տեղն այնտեղ է, երեխաները դպրոց պետք է գնային՝ չեն կարողանում գնալ։ Պահանջում ենք կառավարության նիստի ժամանակ այս հարցը լուծել։ Մարդիկ արդեն չեն կարողանում ապրել. կեցության, հացի խնդիր ունեն, բիզնեսներն այնտեղ խորտակվում են, տարիների քրտնաջան աշխատանք է»։
Քաղաքացիների խոսքով, այստեղ աշխատելու փորձեր կատարել են, սակայն տուն-տեղը, հիմնական աշխատանքը Ռուսաստանում է, պետք է վերադառնան։ Նրանց խոսքով, ընտանիքները բաժանված են, ամուսիններից մեկը վեց ամիս է կամ այստեղ է մնացել պատանդ, կամ՝ ՌԴ-ում երեխաների հետ։
Կառավարության առաջ ցույց անող քաղաքացիներից մեկն էլ ասաց` հույս չունեն, որ արտակարգ դրությունը հանելուց հետո անգամ կկարողանան մեկնել, որովհետեւ կառավարությունը հստակ ոչինչ չի մանրամասնում` թռիչքները ե՞րբ են վերականգնվելու, ցամաքային ճանապարհը ե՞րբ է բացվելու եւ այլն։ Հավաքվածների տվյալներով, մոտ 2000 քաղաքացի այս իրավիճակում է։
Կարդացեք նաև
Ոչ այնքան տարեց մի կին էլ, որը մարտ ամսից այստեղ է եւ չի կարողանում մեկնել՝ ընտանիքին միանալու, դժգոհեց, ճիշտ է` այստեղ՝ Հայաստանում բնակարան ունի, բայց եկամուտ չունի, ոչ էլ կարողանում է աշխատանքի ընդունվել` տարիքի պատճառով։ Մինչդեռ Ռուսաստանում այդ խնդիրը չունի։
«Հիմա գործատուները տեսնեն` կճանաչեն։ Քանի տեղ դիմել եմ, տարիքս մի հինգ տարի էլ խաբում էի, որ գործի վերցնեն, բայց ասում են` մորքուր, մեզ 18-35 տարեկան է պետք։ Խնդրում ենք, պահանջում ենք, մի բան անեն` գնանք հասնենք մեր ընտանիքներին, վեց ամիս է այստեղ ենք։ Վարկերի տակ ճռռում են մարդիկ, չեն կարողանում գնալ, որ այդ հարցերը լուծեն»,-ասաց նա: Տիկնոջ խոսքով, 30 հազար դրամ թոշակ է ստանում. «Դրանով գազի՞ փող տամ, լույսի՞ փող տամ թե ապրեմ»։
Լուսինե ԲՈՒԴԱՂՅԱՆ
