Ազգային ժողովն այսօր քննարկում է ՍԴ դատավորների ընտրության հարցը. ՀՀ նախագահը սահմանադրական դատարանի դատավորի պաշտոնում առաջադրել է իրավաբան Արթուր Վաղարշյանի թեկնածությունը, եւ պատգամավորները մինչեւ քվեարկելը հարցեր պետք է հղեն նրան:
Մինչ այդ Վաղարշյանին ներկայացրեց նախագահի աշխատակազմի ղեկավար Էմիլ Տարասյանը: «Իմ քայլի» պատգամավոր Վահագն Հովակիմյանը նկատեց՝ Արթուր Վաղարշյանն առաջադրվել էր նաեւ մոտ մեկ տարի առաջ եւ չէր ընտրվել, ուստի ինչո՞վ է պայմանավորված նույն գումարման ԱԺ-ում թեկնածուին կրկին առաջադրելը: Էմիլ Տարասյանը պատասխանեց. «Թեկնածուներն առաջադրել են իրենց թեկնածությունը, ձեւավորվել է մասնագիտական խումբ, եւ առավել շատ դրական կարծիք հավաքած երեք թեկնածուները ներկայացվել են նախագահին: Գոռ Հովհաննիսյանը հրաժարվել է, իսկ Արթուր Վաղարշյանը համաձայնել է իր թեկնածությունը երկրորդ անգամ առաջադրել»:
Վահագն Հովակիմյանը Տարասյանի պատասխանը մտահոգիչ որակեց. «Չընտրված թեկնածուին առաջադրում եք նույն խորհրդարանին»:
Անկուսակցական պատգամավոր Արման Բաբաջանյանն էլ հարցադրում արեց՝ ստացվում է, որ ԱԺ-ն այնքան անսկզբունք կառույց է, որ մեկ տարում պետք է դիրքորոշում փոխե՞ր թեկնածուի մասին: Տարասյանը պնդեց՝ պարզապես չեն մերժել անձի առաջադրվելու ցանկությունը, եւ հարցը որեւէ քաղաքական ենթատեքստ չունի:
Կարդացեք նաև
«Իմ քայլի» պատգամավոր Վաղարշակ Հակոբյանն էլ ասաց. «Երբ լսեցի, որ Արթուր Վաղարշյանը երկրորդ անգամ է առաջադրվել, ինձ թվաց՝ կատակ է»: Էմիլ Տարասյանը կրկնեց նույն պատասխանը:
Լուիզա ՍՈՒՔԻԱՍՅԱՆ
