Լրահոս
Օրվա լրահոսը

Հայաստանի ժուռնալիստների միությունը դատապարտում է

Դեկտեմբեր 02,2020 19:07

Դեկտեմբերի 1-ին վարչապետ Նիկոլ Փաշինյանի հրաժարականի պահանջով կազմակերպված բողոքի ակցիայի ընթացքում ոստիկանները խոչընդոտել են լրագրողների աշխատանքը և փորձել են բերման ենթարկել «Երկիր Մեդիա» հեռուստաընկերության օպերատոր Հայկ Սուքիասյանին։ Հեռուստաընկերության քաղաքական և լրատվական հաղորդումների տնօրեն Գեղամ Մանուկյանը հայտարարել է, որ բողոքի ակցիայի այլ մասնակիցների թվում, ոստիկաններն ուժ կիրառելով, օպերատորին նստեցրել են մեքենան, բայց կարճ ժամանակ անց բաց են թողել: Քաշքշուկի ժամանակ կոտրվել է հեռուստաընկերության տեսախցիկը։

Հայաստանի ժուռնալիստների միությունը խստորեն դատապարտում է տեղի ունեցածը և պետական կառույցներից պահանջում է իրականացնել կատարվածի վերաբերյալ համակողմանի և անկողմնակալ հետաքննություն, պատասխանատվության ենթարկել լրատվամիջոցի ներկայացուցչի նկատմամբ բռնի ուժ գործադրողներին, ինչպես նաև փոխհատուցել հեռուստաընկերության տեխնիկայի վնասը։

Միևնույն ժամանակ ստիպված ենք արձանագրել, որ, թեև միջադեպը տեղի է ունեցել առանձին վերցրած մեկ լրատվամիջոցի ներկայացուցչի նկատմամբ, սակայն այն վկայում է ընդհանուր առմամբ իշխանությունների՝ մամուլի հանդեպ ունեցած անհանդուրժողական վերաբերմունքի մասին։ «Երկիր Մեդիա»-ի օպերատորի փոխարեն կարող էր լինել ցանկացած այլ լրատվամիջոցի ներկայացուցիչ։ Տեսանյութերում ակնհայտ են լրատվամիջոցների ներկայացուցիչների նկատմամբ ոստիկանության աշխատակիցների բիրտ և անհանդուրժողական վերաբերմունքը, ինչը խոչընդոտում է ԶԼՄ-ների աշխատանքը։

Հատկապես այնպիսի ֆորսմաժորային իրավիճակներում, որպիսին ներկայումս տիրում է Հայաստանում, բազմապատիկ ավելանում է լրատվամիջոցների ու լրագրողների աշխատանքի նշանակությունն ու դերը։ Պետական կառույցների, իշխանական բոլոր մարմինների սահմանադրական պարտավորությունն է լրագրողների աշխատանքի համար անհրաժեշտ պայմանների ապահովումը։

Լրագրողներն իրացնում են հասարակության՝ տեղեկացված լինելու սահմանադրական իրավունքը, և այդ իրավունքի իրացման դեմ ցանկացած ոտնձգություն է ՀՀ քաղաքացիների նկատմամբ։

 

ՀԺՄ նախագահ Սաթիկ Սեյրանյան

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Դեկտեմբեր 2020
Երկ Երե Չոր Հնգ Ուրբ Շաբ Կիր
« Նոյ   Հուն »
 123456
78910111213
14151617181920
21222324252627
28293031