Սիբիրյան խոցով հոսպիտալացված քաղաքացիների առողջական վիճակը միջին եւ թեթեւ ծանրության է։ Այս մասին այսօր կառավարության նիստից հետո լրագրողների հետ ճեպազրույցում ասաց առողջապահության նախարարի պաշտոնակատար Անահիտ Ավանեսյանը։
Երեկ առողջապահության նախարարությունը տեղեկացրել է, որ Գեղարքունիքի մարզի Վանեւան եւ Տորֆավան համայնքներում կենդանիների շրջանում սիբիրյան խոցի հայտնաբերված դեպքերի առնչությամբ՝ ԱՆ հիվանդությունների վերահսկման եւ կանխարգելման ազգային կենտրոնի «Ռեֆերենս լաբորատոր կենտրոնի» կողմից հունիսի 29-ին կատարվել է նմուշառում այդ համայնքների 7 բնակչից։ Նրանցից 3-ի մոտ հաստատվել է «սիբիրյան խոց» ախտորոշումը:
Տիկին Ավանեսյանն ասաց, որ այս քաղաքացիները ստանում են անհրաժեշտ բժշկական օգնությունը։
«Վերջին երեք-չորս օրերի ընթացքում հիվանդությունների վերահսկման եւ կանխարգելման ազգային կենտրոնի մասնագետները համայնքային այցեր են կատարել եւ բոլոր կասկածելի դեպքերն ուսումնասիրել, նմուշառում կատարել։ Պետք է նշել, որ երեք քաղաքացու մոտ սիբիրյան խոցի մաշկային ձեւն է։ Ամբողջ համայնքն ու շրջակայքը մեր խիստ վերահսկողության ներքո է, հողից փորձանմուշներ են վերցրել եւ անհրաժեշտ բոլոր միջոցառումներն արվում են»,-ասաց տիկին Ավանեսյանը։ Նա նշեց, որ հիվանդության փոխանցման աղբյուրը հայտնի չէ։
Կարդացեք նաև
Նելլի ԲԱԲԱՅԱՆ
