«Վերջին իրադարձությունները ցույց տվեցին, որ Եվրոպան և ԵՄ-ն Հարավային Կովկասում Հայաստանի երկարաժամկետ գործընկերն է: Վերջին իրադարձությունները ցույց տվեցին, որ ՀՀ-ն չի կարող իր անվտանգության երաշխիքների հարցում հենվել ավանդական իր գործընկերոջ վրա, քանի որ նա ՀՀ-ին չօգնեց 2020-ին և 2022-ին»,- Եվրամիություն-Հայաստան խորհրդարանական գործընկերության կոմիտեի 3-րդ նիստի ժամանակ հայտարարեց Արտաքին գործողությունների եվրոպական ծառայության Եվրոպայի և Կենտրոնական Ասիայի հարցերով կառավարող տնօրենի տեղակալ Լյուկ Դևինը:
Նա որպես հակադրություն նշեց. «ԵՄ-ն ակտիվացրել է իր հարաբերությունները Հարավային Կովկասում ներգրավվածության և Ադրբեջանի հետ հարաբերությունների բարելավման հարցում: ՀՀ-ն, եթե շարունակի իր բարեփոխումները լավ կառավարման, ժողովրդավարության հարցում, ԵՄ-ն ակտիվ կաջակցի Հայաստանին»:
Նա, վկայակոչելով մարտի 5-ին Ադրբեջանի կողմից հարձակումները, ասաց. «Ցավոք, վերջին վայրագությունները ցույց տվեցին, որ հրատապ է երկխոսության վերականգնումը: Հրատապ հարց է նաև ռազմագերիների վերադարձը, սահմանազատման հարցերը, տրանսպորտային հաղորդակցությունների ապաշրջափակումը և այս համատեքստում Լաչինի միջանցքի ապաշրջափակումը»:
Նա նաև կարևորեց Ստեփանակերտի և Բաքվի միջև ուղիղ հարաբերություններն ու ասաց. «Մենք նաև քաջալերում ենք Բաքվի և Ստեփանակերտի ուղիղ բանակցությունները: Վերջին հանդիպումը ճիշտ ուղղության վրա է»:
Կարդացեք նաև
Եվրոպական խորհրդարանի պատգամավոր Ռոբերտ Հեյշելն էլ կարևորեց ՀՀ-ի տարածքային ամբողջականության հարգումը. «Տարածքային ամբողջականության հարգումն ու միջազգային պայմանագրերով ստանձնած պարտավորությունների կատարումը կարևոր նախապայման է խաղաղության հասնելու համար: Երկու կողմերը պետք է հարգեն այդ սկզբունքները՝ հատկապես Հայաստանի տարածքային ամբողջականությունը պետք է երաշխավորվի: Հաշվի առնելով աշխարհաքաղաքական իրավիճակը և մարտահրավերները՝ Հայաստանն ունի բավականին լուրջ խնդիրներ անվտանգության համակարգերի դիվերսիֆիկացման հարցում»:
Եվրոպական խորհրդարանում Հայաստանի հարցերով մշտական զեկուցող Անդրեյ Կովաչևն էլ հայտնեց՝ զեկույց է պատրաստել, որը քվեարկության է դրվելու Ստրասբուրգում՝ Եվրոպական խորհրդարանի լիագումար նիստում. «ԼՂ խնդիրը կարոր հարց է, որը միշտ պետք է լինի օրակարգում, որպեսզի ունենա միջազգային երաշխիքներ, որ ԼՂ-ում հայերի անվտանգությունն ապահովված է: Պետք է ապահովվի հայ ռազմագերի վերադարձը, պետք է ավարտվի սահմանագծման և սահմանազատման գործընթացը, որը խաղաղության օրակարգի հետ միասին նույն գծով է գնում»:
Անդրեյ Կովաչևը նաև կարևորեց այն, որ Ադրբեջանը կատարի ՄԱԿ-ի դատարանի որոշումը և ապահովի Լաչինի միջանցքով մարդկանց և բեռնափոխադրումների ազատ տեղաշարժը: Նա նշեց, որ այս հարցը ևս ներառված է լինելու իր պատրաստած զեկույցում:
Տաթև ՀԱՐՈՒԹՅՈՒՆՅԱՆ
