Անտառների կառավարում ծրագրով 2022-ին պետական բյուջեից հատկացվել է 2․1 մլրդ դրամ։ Այս մասին Ազգային ժողովում 2022 թվականի պետական բյուջեի կատարողականի քննարկման ժամանակ ասաց Շրջակա միջավայրի նախարար Հակոբ Սիմիդյանը։
Նախարարը նշեց, որ անտառապատման, նոր անտառների հիմնման ու անտառապահպանման աշխատանքների 2022 թվականի կատարողականը վերջին տարիների համար աննախադեպ է՝ կազմելով 93 տոկոս։ 2021 թվականին կատարողականը 62 տոկոս էր կազմել։ Նա նշեց, որ նախատեսում են տարեկան մինչեւ 1․5 մլն տնկի ունենալ, որը մեծամասամբ կբավարարի նոր անտառ հիմնելու համար։
Անդրադառնալով ապօրինի ծառահատումների խնդրին՝ Հակոբ Սիմիդյանն ասաց, որ թվերը վատը չեն։ «2018 թվականին 3072 հատ ծառ է հատվել, սրանք արձանագրված թվերն են, 2019 թվականին այս թիվը հասել է 15 հազարի։ 2021 թվականին կազմել է 11 հազար, իսկ 2022 թվականին 6200։ Այսինքն՝ եթե դինամիկան տեսնենք՝ 2018 թվականից հետո բարձրացել է, հետո նվազող տրամաբանություն ունի»,- ասաց նախարարը։
Ըստ նրա՝ նոր ծառայության միջոցով կկարողանան անտառածածկ տարածքների նկատմամբ 24-ժամյա հսկողություն սահմանել։ «Մենք հիմա մեր ամբողջ էներգիան փորձում ենք դնել, որ պահպանությունը պատշաճ իրականացնենք, բայց այն ինստիտուցիոնալ համակարգը, որն այս պահին որպես գործիք ունենք, համոզված եմ, բավարար չէ, որովհետեւ 24 ժամից 9 ժամն է աշխատանքային։ Դրա համար ձեռնամուխ ենք եղել նոր ծառայության հիմնմանը, որը կփոխի իրավիճակն ամբողջությամբ»,- ասաց նա։
Կարդացեք նաև
Ռոզա ՀՈՎՀԱՆՆԻՍՅԱՆ