Այսօր Շրջակա միջավայրի փոխնախարար Տիգրան Գաբրիելյանը ներկայացրեց «Ջրային օրենսգրքում» փոփոխություններ, լրացումներ կատարելու մասին նախագիծը, որը Սեւանա լճից ձկնային պաշարների օգտագործման հետ է կապված:
ՔՊ խմբակցության պատգամավոր Սերգեյ Բագրատյանը հարցրեց. «Սիգի որսի հետ կապված ընդունել եք որոշում՝ 150 հազար դրամից ավելի դեպք գրանցելու դեպքում քրեական պատասխանատվության ենթարկելու մասին: Ասենք, ինչի՞ 250 հազար դրամ չեք որոշել, 350 հազար: Կարող են մարդիկ 140 հազար դրամից չանցնել ու բազմակի անգամ դա անել ու ընկնել քրեական պատասխանատվության տակ: Արդեն պարզ է, որ պետք է 140 հազար դրամի գողություն անել»:
Փոխնախարարը պատասխանեց, որ նկատի են ունեցել վաճառքի ափերը եւ հաշվարկ են արել. «Ճիշտ եք ասում, սողանցք կա, բայց այդ 140 հազարի համար էլ կա վարչական տույժ»:
Բագրատյանն ասաց, որ վաճառքի հանում են մի արկղ ձուկ, իսկ մի քանի միլիոնի պահեստում են թողնում, երբ վաճառեցին, կհանեն: Իսկ տուգանելիս գալիս տանում են այդ մի արկղը, որտեղ կարող է լինել օրինակի համար 50 հազար դրամի ձուկ. «Դուք ասում եք՝ դրա համար էլ տուգանք կա, OK, բայց ինքը ավելի լավ է վարչականով վճարի 20 հազար դրամ, բայց վաճառի 50 հազարի ձուկ»:
Կարդացեք նաև
Փոխնախարարն ասաց, որ էկոպարեկները արդեն կպայքարեն ապօրինի որսի դեմ, ու Երեւանում ապօրինի բռնված ձուկ էլ չենք տեսնի:
Հռիփսիմե ՋԵԲԵՋՅԱՆ
