«Մենք պատրաստ ենք քննարկել ու ստորագրել իմպիչմենտի գործընթացը։ Միակ խնդիրը, որ այս պահին մենք այդ փաստաթուղթը մուտք չենք անում, ինչպես նշված է մեր նամակի մեջ՝ «Պատիվ ունեմ» խմբակցությունը վարչապետի թեկնածու չունի»,- խորհրդարանում լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։
«Քանի որ ՀՀԿ-ն բազմիցս հայտարարել է, որ այս գործընթացը մեզ համար իշխանափոխության ամենահավանական տարբերակն է, նաեւ հայտարարել ենք՝ մեզ համար առաջնահերթությունն իշխանափոխությունն է, այլ ոչ թե իշխանության հասնելը, դրա համար ավելի պարզ, ավելի հեշտ այս գործընթացն իրականացնելու համար պատրաստ ենք նմանօրինակ քննարկումների ցանկացած շահագրգիռ կողմի հետ»,- ասաց Հայկ Մամիջանյանը՝ հավելելով, որ «Հայաստան» խմբակցությունն այդ հարցում առաջիններից է։
Դիտարկմանը՝ «Հայաստան» խմբակցությունից ասում են՝ եթե կարողանան 8 պատգամավորի ստորագրություն բերել, իրենք խմբակցության 28 պատգամավորների ստորագրությունը պատրաստ են տրամադրել եւ հարցին՝ կարո՞ղ են այդ թիվը լրացել, Հայկ Մամիջանյանը պատասխանեց․ «Ես չեմ համարում հայրենիքի համար պայքարի պարագայում դու պետք է նստես ու հաշվես՝ ինչքան է հաջողության հասնելու հավանականությունը։ Մեր բոլորի տրամաբանությունը հետեւյալն է՝ բոլոր գործոնները, գործողությունները հասցնել իրենց արդյունավետության մաքսիմումի ու կպնել գործի»։
Մանրամասները՝ տեսանյութում
Կարդացեք նաև
Հայկ Մամիջանյանը պատասխանեց նաեւ երեկ ԱԺ նախագահ Ալեն Սիմոնյանի արած հայտարարություններին, որ եթե այս ուրբաթ ընտրություններ լինեն ՔՊ-ն հաղթելու է՝ 50+1 տոկոսով, իսկ 2026-ին ավելի շատ տոկոսով։
«ՀՀ ամեն 3-րդ քաղաքացի Նիկոլ Փաշինյանին համարում է դավաճան, այդպիսի վարկանիշ ունեցող քաղաքական միավորի ներկայացուցիչները լավ կլինի՝ սուս մնան։ Եթե պարոն Սիմոնյանը հպարտանում է այս կամ այն սոցիոլոգիական հարցումներով, այդ նույն հարցումներով իր վարկանիշը, եթե չեմ սխալվում, Վարդան Ղուկասյանի վարկանիշի կողմերն է, թող շարունակի դրանով հպարտանալ»,- ասաց նա։
Մանրամասները՝ տեսանյութում
Նելլի ԳՐԻԳՈՐՅԱՆ
