Նշենք, որ հատկապես վերջին երկու տարիներին մի փոքր անձրեւն անգամ Երեւանում առաջացնում են հեղեղներ, ճանապարհները վերածվում են գետերի։ Մասնագետները նշում են, որ ստեղծվածվիճակի պատճառը ոչ ճիշտ իրականացվող կառուցապատումն է։
«Փաստինֆո»-ն դիմել էր Երեւանի քաղաքապետարանին մեկնաբանության համար, ինչին ի պատասխան մամուլի խոսնակ Հայկ Կոստանյանը նշել է՝ «Երևան քաղաքի հեղեղատար համակարգը կատարյալ չէ։ Ի սկզբանե կան թաղամասեր, որոնք չունեն հեղեղատար համակարգեր, կան վերակառուցման ենթակա համակարգեր, նոր կառուցապատումները հանգեցրել են նոր ծավալների։ Որքան քաղաքը բարեկարգվում եւ կառուցապատվում է, այնքան մեծանում է մակերեւութային ջրերի քանակը, որովհետեւ գրունտը հողն իր մեջ է քաշում, նոր կառուցապատումը, ասֆալտապատումը, սալիկապատումը բերում է մակերեւութային ջրերի ծավալի ավելացման։ Երևանն ունի շատ փոքր ծավալի անջատ հեղեղատար համակարգ, կիսանջատ է մեր համակարգը, այն միացված է կոյուղատար համակարգին նաեւ եւ մեծ ծավալի անձրեւների դեպքում համակարգը ծանրաբեռնվում է, ու ջրերի քանակը փողոցներում մեծանում է»։
Իսկ թե ինչու կառուցապատման թույլտվություններին զուգահեռ չեն հաշվարկել հեղեղատար համակարգի բարելավումը՝ քաղաքապետարանում լռում են։
