KANTSASAR. Հովանաւորութեամբ Հալէպի կաթողիկէ առաջնորդներուն, Հալէպի ազգային կազմաւորման կաթողիկէ եպիսկոպոսական յանձնախումբը Հինգշաբթի, Ուրբաթ եւ Շաբաթ՝ 1,2 եւ 3 Մայիսին կազմակերպեց հայրենիքի վերածաղկումին նուիրուած համագումար մը «Սուրիոյ Քրիստոնեաներ՝ Վաւերականութիւն, Մասնակցութիւն եւ Առաքելութիւն» խորագրով, որ տեղի ունեցաւ կաթողիկէ Համայնքի քրիստոնէական դաստիարակութեան միութեան սրահէն ներս, Ազիզիէ, Հալէպ։
Եռօրեայ համագումարը կ՛ընդգրկէր դասախօսական նիստեր, զրոյցներ եւ գեղարուեստական յայտագիր, լուսարձակի տակ կ՛առնէր Սուրիոյ քրիստոնեաներու պատմական, արմատական ներկայութիւնը, երկրի զարգացման տարբեր փուլերուն անոնց ունեցած դերը եւ ներկայ փուլին անոնց ակնկալութիւններն ու դրական մասնակցութիւնը Սուրիոյ վերածաղկումի աշխատանքներուն։
Համագումարը կարեւոր կը համարէր սուրիական ընկերութեան տարբեր բաղադրիչներու մասնակցութիւնը երկրի վերակերտման այս փուլին, սուրիական ընկերութեան միասնութիւնը էական մարտահրաւէր համարելով։
Վերջին օրը անդրադարձ կատարուեցաւ նաեւ Սուրիոյ սահմանադրութեան մէջ քրիստոնեայ համայնքներու իրաւունքներու պաշտպանուածութեան, ժողովրդավարութեան, կրօններու եւ մշակոյթներու ազատութեան պահպանման կարեւորութեան։
Կարդացեք նաև
Համագումարին ներկայ էին քրիստոնեայ համայնքապետներ, Հալէպի նահանգապետարանի ներկայացուցիչներ, բարեսիրական եւ երիտասարդական միութիւններ, ինչպէս նաեւ հալէպահայ միութիւններու, յարանուանութիւններու եւ Բերիոյ Հայոց Թեմի Ազգ․ վարչութեան ներկայացուցիչներն ու Առաջնորդի ներկայացուցիչ Հոգշ․ Տէր Արմէն Աբղ. Գալաճեանը։
Համագումարի վերջին օրուան նիստերուն ներկայ գտնուեցաւ եւ խօսք առաւ նաեւ Հալէպի նահանգապետ Ազզամ Ղարիպը։ Ան ըսաւ, որ քրիստոնեաները անբաժան մասնիկն են սուրիական ընկերութեան ու պիտի շարունակեն սիրոյ եւ խաղաղասիրութեան իրենց առաքելութեամբ նպաստել հայրենիքի վերածաղկումին։ Համագումարի աւարտին ընթերցուեցաւ միացեալ յայտարարութիւն մը։
