Դիլիջանում արդեն երրորդ անգամ անցկացվում է հայ-վրացական խոհարարական փառատոնը: Այն մեկնարկել է հունիսի 19-ից եւ կտեւի մինչեւ հունիսի 21-ը: «Մեզ համար շատ մեծ ու կարեւոր օր է, որ այսօր Հայաստանում իրականանում է միջազգային խոհարարական մրցույթ, որի նպատակն է Հայաստանը դիրքավորել որպես խոհարարական անցուդարձի, խոհարարական շարժի կարեւոր հարթակ, որի արդյունքում կսկսենք միանալ աշխարհում խոհարարական զարգացումներին: Իսկ աշխարհում ընդհանրապես խոհարարական զարգացումները շատ արագ են իրականանում, ու որպեսզի հետ չմնանք, կարիք ունենք շփվելու, մասնակցելու այդ զարգացումներին, եւ այս մրցույթը հենց այդ նպատակն է հետապնդում»,-Սպուտնիկ Արմենիայի մամուլի սրահում կայացած ասուլիսում նշեց «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը:
Նա տեղեկացրեց, որ փառատոնի առիթով Հայաստան են այցելել 9 երկրների ներկայացուցիչներ՝ ճանաչված խոհարարներ, խոհարարական ասոցիացիաների ղեկավարներ: Հավելեց, որ խոհարարական մրցույթը կկայանա միջազգային կանոններին համապատասխան, խոհարարները 4 մսատեսակով կմրցեն՝ ձուկ կպատրաստեն, նաեւ գառան, հավի ու տավարի մսից կերակրատեսակներ: Հաղթողների մեդալները եւ պարգևները կհանձնվեն հունիսի 21-ին՝ հայ-վրացական «Միմինո» փառատոնի ժամանակ: Պարոն Մամուլյանն ընդգծեց, որ խոհանոցը միավորում է մարդկանց եւ ազգերին:
Ասուլիսին ներկա Իսպանիայի, Սերբիայի Չեչնիայի, Ռուսաստանի ներկայացուցիչները կարեւորեցին նման միջոցառումների անցկացումը: Ռուսաստանի ներկայացուցիչն ասաց, որ խոհարարությունն այսօր շատ կարեւոր մասնագիտություն է, սակայն հաճախ հետին պլանում է հայտնվում: Նա նշեց, որ նման մի փառատոն անցյալ տարի Ռուսաստանում է կայացել, այս տարի Հայաստանում է կայանում, գուցե հաջորդ տարի էլ Ղազախստանում լինի: Հավելեց, որ փառատոնին ամեն երկրի խոհարար կարող է նաեւ իր երկրի խոհանոցը ներկայացնել, բոլորը ազատ են ստեղծագործել, սակայն պետք է պատրաստեն միայն իրենց տրված մթերքներով:
Կարդացեք նաև
Գոհար ՀԱԿՈԲՅԱՆ
