Հունիսի 19-ի՝ լույս 20-ի գիշերը Գյումրու կենտրոնում՝ «Գյումրի Հացատան» դիմաց հնչել են կրակոցներ։ Վիճաբանություն է տեղի ունեցել, ծեծկռտուք, որն ավարտվել է կրակոցներով։ Ինչպես հայտնում է Shamshyan.com-ը, մասնակիցներից մեկը իր մոտ եղած հրազենով մի քանի կրակոց է արձակել և ըստ օպերատիվ տվյալների՝ 1 հոգի վիրավորում է ստացել կրակոցից, 2 հոգի էլ՝ ծեծկռտուքի հետևանքով:
Շիրակի մարզի քրեական ոստիկանները պարզել են, որ ոչ մի վիրավոր չի տեղափոխվել հիվանդանոց․ բուժումներ են ստանում տնային պայմաններում:
Shamshyan.com-ը նաև տեղեկացնում է, որ դեպքի փաստով Շիրակի մարզային քրեական վարչությունում փաստաթղթեր են կազմվում, և ոստիկաններն էլ արդեն գիտեն մասնակիցների և կրակոցներ արձակողի ինքնությունը, ով Գյումրիում հայտնի քրեական պատմությունների մեջ բազմիցս ներգրավված է եղել:
Aravot.am-ին հայտնի է դարձել, որ «Գյումրի Հացատան» դիմաց տեղի ունեցած միջադեպը կապված է Գյումրու ՏԻՄ ընտրությունների հետ․ կրակոցներ արձակելու մեծ կասկածվող անձը, որի հայրը մի քանի տարի առաջ օրը ցերեկով սպանվեց Գյումրու կենտրոնական հատվածներից մեկում, չի համակերպվել այն փաստի հետ, որ Գյումրու ՏԻՄ ընտրություններում քաղաքական ուժերից մեկը իր ձայնը տվել է ընդդիմադիր թեկնածու Վարդան Ղուկասյանին՝ նրան քաղաքապետ դարձնելով։
Կարդացեք նաև
Նա «Գյումրի հացատան» դիմաց հաշիվ է պահանջել տվյալ քաղաքական ուժի ղեկավարի հարազատներից։
Նախաքննության շահերից ելնելով՝ այս պահին մեզ հայտնի դարձած այլ մանրամասներ չենք հրապարակում, հատկապես որ դեռ ձերբակալվածներ չկան։
Նունե ԱՐԵՎՇԱՏՅԱՆ
