Հայ կրթական հիմնարկությունը սոցիալական ձեռներեցներ և կրթական տեսլականներ ունեցող Ռուբեն Վարդանյանին և Վերոնիկա Զոնաբենդին կպարգևատրի հեղինակավոր «Educational Visionaries Award» մրցանակով իր 75-ամյակի հանդիսության ժամանակ, որը կկայանա սեպտեմբերի 7-ին Բևեռլի Հիլզ Հիլթոն հյուրանոցում, տեղեկանում ենք «UWC Դիլիջան»-ի կայքից:
Վերոնիկա Զոնաբենդը ներկա կլինի զույգի անունից մրցանակը ստանալու համար։ Ցավոք, Վարդանյանը գերության մեջ է Բաքվում՝ Արցախի Հանրապետությանը իր աջակցության հետևանքով:
Կգնահատվի Ռուբեն Վարդանյանի և Վերոնիկա Զոնաբենդի փոխակերպող ներդրումը համաշխարհային կրթության մեջ, ինչպես նաև նրանց կարևոր դերը UWC Դիլիջանի՝ Հայաստանի առաջին միջազգային գիշերօթիկ դպրոցի հիմնադրման գործում:
Նրանց ղեկավարությամբ UWC Դիլիջանը դարձել է միջմշակութային ուսուցման առաջատար կենտրոն՝ նպաստելով համաշխարհային կրթական դաշտի առաջատար դիրքեր Հայաստանի առաջմղմանը։
Կարդացեք նաև
2014 թվականին հիմնադրված UWC Դիլիջանը մարմնավորում է UWC-ի առաքելությունը՝ «կրթությունը դարձնել մարդկանց, ազգերին և մշակույթներին միավորող ուժ՝ խաղաղության և կայուն ապագայի համար»։
Զոնաբենդի և Վարդանյանի ղեկավարությամբ UWC Դիլիջան-ը կրթել է 125 երկրների ուսանողների և վերափոխել Դիլիջանի տնտեսությունը՝ ստեղծելով ավելի քան 2000 տեղական աշխատատեղ և խթանելով համայնքի ներգրավվածությունը կրթական և սոցիալական նախաձեռնությունների միջոցով։
Վարդանյանի և Զոնաբենդի բարեգործական ջանքերը տարածվում են UWC Դիլիջանից անդին։ Միասին նրանք հիմնադրել են RVVZ ընտանեկան հիմնադրամը, IDeA բարեգործական հիմնադրամը և Scholae Mundi հիմնադրամը՝ կենտրոնանալով կայուն զարգացման և գլոբալ կրթական նախաձեռնությունների վրա։
Ռուբեն Վարդանյանն ազդեցություն է ունեցել սոցիալ-տնտեսական զարգացման վրա այնպիսի նախագծերի միջոցով, ինչպիսիք են «Ավրորա» մարդասիրական նախաձեռնությունը և «Հայ գիտության և տեխնոլոգիաների հիմնադրամը» (FAST):
Նա բազմաթիվ միջազգային մրցանակների դափնեկիր է կրթության և համայնքի զարգացման գործում ունեցած ներդրման համար, այդ թվում՝ AIB նախագահական մրցանակի և Common Ground մրցանակների։
Վերոնիկա Զոնաբենդը կրթական բարեգործության շարժիչ ուժն է եղել։ Նա 2014 թվականին նա ՀՀ նախագահի կողմից պարգևատրվել է Բարեկամության շքանշանով, իսկ 2024 թվականին պարգատրվել Հայ կանանց միջազգային ասոցիացիայի կողմից՝ Հայաստանի կրթության գործում ունեցած նշանակալի և շարունակական ներդրման համար։
