-Նման միջազգային գագաթաժողովներում, ըստ էության, շփումներ լինում են բոլորի հետ, բայց շփումների արդեն կոնկրետ ձեւաչափը տեղում կերեւա եւ նաեւ աշխատանքներ կլինեն, թե փոխադարձ ինչպիսի հետաքրքրություն կա, շփման ձեւաչափի վերաբերյալ,- այսօր կառավարության նիստից հետո լրագրողների հետ հանդիպման ժամանակ ասաց Նիկոլ Փաշինյանը՝ անդրադառնալով Պեկինում Շանհայի համագործակցության կազմակերպության (ՇՀԿ) սպասվող համաժողովի շրջանակներում հնարավոր հանդիպումներին։
«Բայց որ բոլորի հետ էլ կլինեն շփումներ, ես դրանում չեմ կասկածում»,– հավելեց Փաշինյանը:
Հարց հնչեց՝ ինչո՞վ է պայմանավորված, որ Վաշինգտոնում օգոստոսի 8–ին ստորագրված փաստաթղթերը մինչ այս պահը չեն հրապարակվել:
Հիշեցնենք, որ օգոստոսի 8-ին Վաշինգտոնում, բացի ԱՄՆ-ի, Հայաստանի և Ադրբեջանի միջև Եռակողմ հռչակագրից, Նիկոլ Փաշինյանը ստորագրել է ԱՄՆ-ի և Հայաստանի միջև երկկողմանի երեք հուշագիր, որոնցից եւ ոչ մեկը մինչ այժմ չի հրապարակվել:
Կարդացեք նաև
1) «Խաղաղության խաչմերուկ» նախագծի կարողությունների զարգացման ոլորտում գործընկերության մասին.
2) Արհեստական բանականության և կիսահաղորդիչների ոլորտում նորարարական գործընկերության մասին.
3) Էներգետիկ անվտանգության ոլորտում գործընկերության մասին:
Ի պատասխան ասաց. «Ինչ վերաբերվում է մտադրությունների հուշագրին, պիտի արձանագրեմ, որ դրանցից որեւէ մեկը առնվազն ուղիղ չի վերաբերում «Թրամփի ուղուն», այլ վերաբերվում է խաղաղության խաչմերուկին, միջուկային էներգետիկայի ոլորտում, արհեստական ինտելեկտի եւ բարձր տեխնոլոգիաների ոլորտում համագործակցությանը։ Ուղղակի աշխատանքային պայմանավորվածության հարց է եղել, եւ մենք աշխատանքային պայմանավորվածություն ենք ունեցել, որ կհրապարակենք բովանդակությունը, բայց ոչ տեքստը։ Բայց քանի որ հետաքրքրությունը մեծանում է մեր հանրության շրջանում, կարծում եմ, որ մենք առաջիկայում, քանի որ դա երկկողմ փաստաթուղթ է, ամերիկյան գործընկերների հետ համաձայնություն ձեռք կբերենք եւ կհրապարակենք նաև այդ փաստաթղթերը։
Բայց ես գիտեմ նաև, որ որոշակի փորձագիտական և պատգամավորական շրջանակներում կա հետաքրքրություն այդ թեմայի վերաբերյալ, ես հանձնարարել եմ, որ հետաքրքրվող փորձագետները կամ որոշակի շրջանակի փորձագետներ, եւ Ազգային ժողովի ցանկացած պատգամավոր կարող է ծանոթանալ այդ տեքստի բովանդակությանը, որի մեջ ասեմ որևէ գաղտնիք չկա։ Այդ փաստաթղթերը իրենք իրենց էությամբ և բովանդակությամբ գաղտնի չեն, իրենց վրա գաղտնի գրիֆ չկա, դա աշխատանքային փաստաթուղթ է։ Ես կարծում եմ, որ առաջիկայում մենք կհրապարակենք»:
Արփինե ՍԻՄՈՆՅԱՆ
