29 օգոստոսի, Դիլիջան: Դիլիջանցի պատանիների ու երիտասարդների համար այս տարի հնարավորություն է ստեղծվել աշխատանքային առաջին փորձը ձեռք բերել և հյուրընկալության ոլորտի հմտություններ սովորել քաղաքի սրճարաններից մեկում:
Հատկապես պատանիների համար այս փորձառությունը կարևոր է մասնագիտական կողմնորոշման համար. այնտեղ նրանք կարողացել են ձեռք բերել թիմային աշխատանքի, հաղորդակցման փորձ։
«Սեպտեմբերի 1-ը մեզ համար կրկնակի խորհրդանշական է․ մեր թիմում աշխատող դեռահասները վերադառնում են դասերին, բայց նաև շարունակում են իրենց ճանապարհը՝ սովորելով և զարգանալով աշխատանքային փորձի միջոցով։ Սա սոցիալական նախաձեռնության վառ օրինակ է և հնարավորություն է տալիս դեռահասներին ու ուսանողներին աշխատել և հմտանալ՝ միաժամանակ մասնակից լինելով համայնքային կյանքին ու Դիլիջանում աշխատանքի նոր մշակույթի ձևավորմանը», – նշում է պատանիներին հյուրընկալած Սրճարան #2-ի տնօրեն Էդվարդ Պողոսյանը։
Նա հավելում է, որ աշխատանքային փորձին զուգահեռ՝ պատանիներն ստանում են նաև ոլորտին վերաբերող որոշակի գիտելիքներ, պատասխանատվությամբ են մոտենում իրենց աշխատանքին և արդեն ավելի հեշտ են կարողանում կողմնորոշվել ապագայում:
Կարդացեք նաև
Համայնքի երիտասարդության ներգրավումը, նրանց նոր գիտելիքի ու փորձի փոխանցումը նա համարում է սկզբունքային ուղղություն, քանի որ դա ներառականություն է ապահովում, թույլ է տալիս երիտասարդներին մասնակից դառնալ իրենց իսկ համայնքի զարգացմանը, հանգստի ու ժամանցի համար հարմարավետ միջավայր ստեղծել ինչպես բնակիչների, այնպես էլ քաղաքի հյուրերի համար:
Դիլիջանում 2014 թ. UWC միջազգային դպրոցի բացումը դարձավ քաղաքում նոր ու դրական փոփոխությունների խթան։ Դպրոցի հիմնադիրները՝ Ռուբեն Վարդանյանն ու Վերոնիկա Զոնաբենդը վստահ էին, որ դպրոցը չպետք է դառնա միայնակ «կղզի», այլ ամբողջ քաղաքը պետք է զարգանա։ Այս գաղափարով ոգեշնչված՝ նրանք սկսեցին իրականացնել տարբեր սոցիալական, մշակութային և համայնքային ծրագրեր, որոնցից մեկն էլ Սրճարան #2-ն է։
Դիլիջանի զարգացման հիմնադրամ
