-Պլանավորված է եղել, դեպքերի զարգացմանը, եթե նայենք, կտեսնեք՝ դեպքերի արագ զարգացումը: Բարերարի հայտնի հայտարարությունը ՝ Հայ Առաքելական եկեղեցուն զորավիգ լինելու վերաբերյալ եւ շատ արագ գործընթացների զարգացում: Որոշակի սադրանքներ էլ են եղել: Սամվել Կարապետյանին մեկուսացրել են, պատանդի կարգավիճակով պահում են այն անձնավորությանը, որը համախմբման եւ Հայաստանի կայացման հարցում մեծ ավանդ ունի,- այսօր ի պաշտպանություն բարերար Սամվել Կարապետյանի՝ Հակակոռուպցիոն դատարանի շենքի բակում լրագրողներին ասաց ՊԵԿ նախկին նախագահ Դավիթ Անանյանը:
-Ինչո՞ւ են վախենում Սամվել Կարապետյանից, որովհետեւ նրա բիզնեսների կայացումը, հարստությունը, որ քրտինքով վաստակել է, Հայաստանում չի վաստակել, դրսում է ամեն ինչ արել: Հետեւաբար, այն խոսույթը հարուստների, հարստություն կուտակելու, օլիգարխիայի վերաբերյալ, որով անընդհատ թիրախավորել են այս կամ այն գործչին, Սամվել Կարապետյանի պարագայում այդ բաղադրատոմսը չի գործում: Դրա համար շատ ավելի ուշադիր են,- ասաց Անանյանը:
Անդրադառնալով այսօր հոգեւորականների ձերբակալություններին՝ պարոն Անանյանն ասաց, որ մեր ինքնության հիմքերին են խփում. «Հայ Առաքելական եկեղեցին այն համազգային կառույցն է, որը 1700 տարվա անխափան գործունեություն ունի: Դարեր շարունակ եկեղեցին պահպանել է մեր ինքնությունը: Եթե ինքնության հիմքերին հարվածելու այդպիսի օրակարգ, պահանջարկ ու հանձնարարական կա, հետեւաբար իշխանական ամբողջ ռեսուրսները պետք է ուղղվեն Հայ Առաքելական եկեղեցուն»:
Կարդացեք նաև
Դավիթ Անանյանն ասաց, որ սրբազաններին մեկուսացնելով, հոգեւորականների, եկեղեցու դեմ այսպիսի գործողություններով հանրությանը եւս մեկ անգամ քնեցնելու, բաղդատելու ու գործընթացների նկատմամբ անհետաքրքրություն սերմանելու հստակ մտադրություն կա:
Հիշեցնենք, որ Հակակոռուպցիոն դատարանն այսօր շարունակում է քննել ազգային բարերար Սամվել Կարապետյանի կալանքի երկարաձգման վերաբերյալ միջնորդությունը: Ի աջակցություն բարերարի՝ դատարանի շենքի դիմաց են հավաքվել բազմաթիվ աջակիցներ: Ի դեպ, այսօր «Մեր ձեւով» շարժման համակարգող Ալեքսան Ալեքսանյանը դատարանի բակում հայտարարեց, որ հոկտեմբերի 18-ին, ժամը 16։30-ին տեղի կունենա շարժման հանրահավաքը:
Կարապետյանի կալանքի երկարաձգման միջնորդության քննությունը սկսվել էր երեկվանից: Հակակոռուպցիոն դատարանի բակում երեկ Սամվել Կարապետյանին աջակցող հավաքին մասնակցել է մոտ 7000 մարդ։Հավաքը եղել է ինքնաբուխ, առանց կազմակերպված հանրահավաքի կամ ցույցի բնույթի։Մինչ հավաքը, ըստ տեղեկությունների, ՔՊ-ականները վարչական ռեսուրս էին կիրառել` սպառնալով ՀԷՑ-ի աշխատակիցներին՝ չմասնակցել աշխատանքային օրվա ավարտից հետո սկսվող խաղաղ հավաքին։
Արփինե ՍԻՄՈՆՅԱՆ
