Ռազմական փորձագետ Վիտալի Մանգասարյանը ֆեյսբուքյան իր էջում գրում է.
«Այս օրերին ակտիվորեն շրջանառվում է այն թեզը, թե Ադրբեջանը իբր կարող է Հայաստանին մատակարարել «էժան բենզին»։ Առաջին հայացքից սա ներկայացվում է որպես տնտեսական շահավետ առաջարկ, սակայն խնդիրը շատ ավելի խորքային է:
Նախ պետք է արձանագրել հիմնական փաստը․ Ադրբեջանը, լինելով նավթարդյունահանող երկիր, իրականում սեփական ներքին շուկայի համար բենզին է ներկրում՝ հիմնականում Ռուսաստանից, Բելառուսից և եվրոպական որոշ երկրներից։
Եթե Ադրբեջանը սեփական սպառման համար տարեկան հարյուր հազարավոր տոննաներով բենզին է ներմուծում միջազգային շուկայական գներով, ապա տրամաբանական հարց է առաջանում․ ինչպե՞ս է այդ նույն երկիրը կարողանալու Հայաստանին երկարաժամկետ կտրվածքով մատակարարել ավելի էժան բենզին: Տնտեսական տեսանկյունից սա անիրատեսական է:
Կարդացեք նաև
Այս համատեքստում «էժան ադրբեջանական բենզինի» թեման ավելի շատ քաղաքական գործիք է, քան տնտեսական առաջարկ։ Այն լուծում է ոչ թե Հայաստանի էներգետիկ կամ սոցիալական խնդիրները, այլ ծառայում է Ադրբեջանի ռազմաքաղաքական ղեկավարության կերպարի «մարդասիրական» ու «կառուցողական» փաթեթավորմանը։ Նպատակը պարզ է՝ ագրեսիվ քաղաքականություն վարող ռեժիմը ներկայացնել որպես «մի հիանալի անձնավորություն»:
Միևնույն ժամանակ, այս քարոզչական թեզը ուղղված է նաև հայ հասարակությանը: Այն ձևավորում է վտանգավոր նարատիվ, ըստ որի՝ հայ հասարակությունը պետք է իր արժանապատվության հաշվին ընդունել ցանկացած առաջարկ՝ միայն թե մի փոքր էժան լինի։ Այսպես հայ հասարակությունը ներկայացվում է, որպես նյութական փոքր շահի համար սկզբունքներից հրաժարվող մարդկանց խումբ»:
