Արշակ սրբազանի խափանման միջոց կալանքը երկարաձգվեց եւս երկու ամսով, տեսակցությունները սահմանափակվեցին: Արշակ սրբազանին կարող են տեսակցել միայն Արշակ սրբազանի քրոջ երեխաները: Այս մասին լրագրողներին հայտնեց Արշակ սրբազանի պաշտպաններից Արսեն Բաբայանը:
«Սրանով շարունակվում են եկեղեցու դեմ ճնշումները: Սրանով շարունակվում է Արշակ սրբազանի դեմ գործընթացը»,- ասաց Բաբայանը:
Հիշեցնենք, որ երեկ՝ փետրվարի 2-ին, դատավոր Կարեն Ֆարխոյանի նախագահությամբ քննվել է Արշակ սրբազանի խափանման միջոց կալանքը երկարաձգելու վերաբերյալ վարույթ իրականացնող մարմնի միջնորդությունը, որոշումը հրապարակվեց այսօր՝ փետրվարի 3-ին:
Կարդացեք նաև
Հիշեցնենք նաեւ, որ ըստ Արշակ սրբազանին առաջադրված մեղադրանքի՝ նա 2018-ին Կաթողիկոսի հեռացումը պահանջող «Նոր Հայաստան, նոր Հայրապետ» շարժման մասնակիցներից մեկին վարկաբեկելու նպատակով հրահանգել էր ակցիայի մասնակիցներից մեկի պայուսակում թմրամիջոց գցել։ Մամուլն էլ ավելի վաղ հայտնել էր, որ կորել է Արշակ սրբազանի գործով միակ իրեղեն ապացույցը՝ մարիխուանայի գլանակը։
Բաբայանն ասաց նաեւ, որ քննիչից էլ ճշտել է, որ մամուլի հրապարակումները, թե այս գործով իրեղեն ապացույց մարիխուանայի գլանակն անհետացել է, չի համապատասխանում իրականությանը:
Արփինե ՍԻՄՈՆՅԱՆ
