Անազատության մեջ գտնվող Արշակ սրբազանի պաշտպաններից Սերգեյ Հարությունյանը այսօր պատրաստվում է վարույթ իրականացնող մարմնից ճշտել՝ արդյո՞ք իր պաշտպանյալ Արշակ սրբազանի գործով անհետացել է իրեղեն ապացույցը։ Նա լրագրողներին ասաց, որ որևէ պաշտոնական, ստույգ տեղեկություն դրա վերաբերյալ չունի։
Հիշեցնենք, որ ըստ Արշակ սրբազանին առաջադրված մեղադրանքի՝ նա 2018-ին Կաթողիկոսի հեռացումը պահանջող «Նոր Հայաստան, նոր Հայրապետ» շարժման մասնակիցներից մեկին վարկաբեկելու նպատակով հրահանգել էր ակցիայի մասնակիցներից մեկի պայուսակում թմրամիջոց գցել։ Մամուլն էլ ավելի վաղ հայտնել էր, որ կորել է Արշակ սրբազանի գործով միակ իրեղեն ապացույցը՝ մարիխուանայի գլանակը։
Մենք այնպիսի իրավիճակում ենք, որ շատ հաճախ նախօրոք կանխորոշված է լինում ամեն ինչ, բայց, եթե այստեղ եմ, հույս ունեմ, որ այսօր գոնե որոշակի փոփոխություն կլինի խափանման միջոցի հարցում։ Հասկանալի է՝ ինչ է կատարվում մեր երկրում, իրավական համակարգում, ճնշումները դատավորների նկատմամբ, բայց, ինչևէ, հույս ունեմ,- լրագրողներին ասաց Սերգեյ Հարությունյանը՝ նախքան մտնելը դատարան, որտեղ դատավոր Կարեն Ֆարխոյանի նախագահությամբ քննվելու է Արշակ սրբազանի խափանման միջոց կալանքը երկարաձգելու վերաբերյալ վարույթ իրականացնող մարմնի միջնորդությունը։
Կարդացեք նաև
Փաստաբանն ասաց, որ Արշակ սրբազանին վերջին անգամ տեսակցել է երեկ չէ առաջին օրը, նրա տրամադրությունը բարձր էր։ Ըստ փաստաբանի՝ Արշակ սրբազանը հումորով, եթե ոչ հեգնանքով է վերաբերում սկսված գործընթացին՝ գիտակցելով, որ այս ամենի պատճառը իրեն ու մյուս սրբազաններին մեկուսացնելն է, որպեսզի այն արշավը, որ տեղի է ունենում Հայ Առաքելական եկեղեցու դեմ, իրականացվի ավելի մեծ թափով․
«Չի կարող մի խմբակ հաղթել 1700-ամյա եկեղեցուն, որը անցել է արաբներով, մոնղոլ-թաթարներով… տարբեր արշավանքներով ու միշտ հաղթած է դուրս եկել»։
Հիշեցնենք, որ Արշակ սրբազանի կալանքի երկարացման միջնորդությունը Երևանի դատարանի երեք նստավայրերում պտտվելուց հետո մակագրվեց Երևան քաղաքի ընդհանուր իրավասության դատարանի դատավոր Կարեն Ֆարխոյանին։ Միջնորդության քննությունը սկսվել է այսօր՝ երեկոյան։
Հիշեցնենք նաև, որ Արշակ սրբազանի նկատմամբ 2025 թվականի դեկտեմբերի 5-ին կիրառվել էր երկամսյա կալանք։ Իսկ Վերաքննիչ դատարանը այս տարվա հունվարի 12-ին մերժել էր պաշտպանական թիմի վերաքննիչ բողոքը և Արշակ սրբազանին թողել երկամսյա կալանքի տակ։
Արփինե ՍԻՄՈՆՅԱՆ
