«2023-ի սեպտեմբերի 25-ին Արցախում բենզինի պահեստի պայթյունի զոհերի հարազատների կարգավիճակի խնդիրը դեռևս չի լուծվել, այդ ընտանիքները բազմաթիվ սոցիալական խնդիրների են այսօր բախվում, որոնք ողբերգական իրավիճակի են հանգեցնում։ Միայն մեկ օրինակ բերեմ՝ միայնակ մայրը երկու անչափահաս երեխաների հետ երկու ամիս է, չի կարողանում վճարել տան վարձը և այսօր հայտնվել է փողոցում»,- Aysor.am–ի հետ զրույցում ասել է Արցախի Հանրապետության պետնախարար Նժդեհ Իսկանդարյանը։
Նրա խոսքով՝ նախորդ տարի, երբ արցախցիները հանրահավաք էին արել և բանակցել փոխվարչապետի հետ, նրանց խոստացել էին լուծել խնդիրը։
«Ասվել էր, որ որոշ ժամանակ է անհրաժեշտ, որպեսզի հարցը կարգավորվի։ Մենք ներկայացրել ենք բոլոր անհրաժեշտ փաստերը, նրանք ընդունել են մեր բերած հիմնավորումները, փաստերը, սակայն կարգավիճակ տալու գործընթացը այդպես էլ մնացել է միայն քննարկումների մակարդակում։ Մեզ խաբեցին, խոստումը տրվեց, բայց գործնականում ոչ մի քայլ չարվեց, մինչդեռ մեզ համար սա շատ կարևոր հարց է, որի լուծումից մարդկային կյանքեր են կախված»։
Նժդեհ Իսկանդարյանն ընդգծել է՝ բազմիցս փորձել է կրկին հարցը բարձրաձայնել, սակայն իր հեռախոսազանգերին փոխվարչապետի աշխատակազմն այլևս չի պատասխանում։
Կարդացեք նաև
Մանրամասները` սկզբնաղբյուր կայքում
