Ընկերության կանոնադրական կապիտալն այն դրամական միջոցների կամ գույքի ամբողջությունն է, որն ընկերության հիմնադիրները կամ բաժնետերերը ներդնում են ընկերության ստեղծման ժամանակ. այն երաշխավորում է ընկերության պարտատերերի շահերը եւ հանդիսանում է իրավաբանական անձի հիմնադրման ու գործունեության նյութական հիմքը:
Ընկերության կանոնադրական կապիտալում որպես ավանդ կարող են ներդրվել դրամ, արժեթղթեր, այլ գույք կամ գույքային իրավունքներ, ինչպես նաեւ դրամական գնահատում ունեցող այլ իրավունքներ:
Ընկերության կանոնադրական կապիտալի եւ մասնակիցների ավանդների անվանական արժեքները որոշվում են դրամով: Իսկ ընկերության մասնակիցների բաժնեմասերի չափը որոշվում է տոկոսներով կամ մասերի տեսքով:
Սահմանափակ պատասխանատվությամբ ընկերությունների համար նվազագույն չափի սահմանափակում չկա, սակայն որոշակի ոլորտների համար (օրինակ՝ բանկեր, վարկային կազմակերպություններ, ապահովագրական ընկերություններ) օրենքով սահմանվում են հատուկ բարձր շեմեր:
Կարդացեք նաև
Կանոնադրական կապիտալի չափը կարող է փոխվել ընկերության որոշմամբ՝ այն ավելացնելով կամ նվազեցնելով: Կանոնադրական կապիտալը ձեւակերպվում եւ հաստատվում է ընկերության կանոնադրությամբ, որն էլ իր հերթին հաստատվում է պետական ռեգիստրի կողմից:
Ընկերության մասնակիցն իրավունք ունի ընկերության կանոնադրական կապիտալում իր բաժնեմասը վաճառել կամ այլ ձեւով օտարել տվյալ ընկերության մեկ կամ մի քանի մասնակիցների:
Իրավաբանական խորհրդատվության, բիզնեսի գրանցման, ինչպես նաեւ պայմանագրերի կազմման ու փորձաքննության հարցերով կարող եք դիմել կորպորատիվ իրավունքի ոլորտում մասնագիտացած «Ավե Յուս» փաստաբանական գրասենյակի փորձառու մասնագետներին՝ գրելով [email protected] էլփոստին կամ զանգահարելով 055 27 77 55 հեռախոսահամարին:
Ավետիք ՀԱՐՈՒԹՅՈՒՆՅԱՆ
«Ավե Յուս» փաստաբանական գրասենյակի հիմնադիր, փաստաբան, իրավաբանական գիտությունների թեկնածու, դոցենտ
«Առավոտ» օրաթերթ
19.03.2026
