«Մենք հայտարարում ենք, որ ապագա իշխանափոխության դեպքում վերանայվելու է եւ հստակ սահմանափակվելու է այս խայտառակ կառուցապատումը, որը կա Երեւանում»,- «Մայր Հայաստան» կուսակցության նախընտրական 10 առաջարկների ներկայացման ժամանակ ասաց Երեւանի ավագանու «Մայր Հայաստան» խմբակցության ղեկավար Մանուկ Սուքիասյանը՝ հավելելով, որ Երեւանը պետք է լինի էկոլոգիապես կանաչ ու հարմարավետ քաղաք։
Մանուկ Սուքիասյան
Մանուկ Սուքիասյանի խոսքով՝ միջազգային խորհրդատվական ընկերություններից մեկի հրապարակած վերջին տվյալներով՝ Երեւանը բնակվելու համար թանկարժեք քաղաք է։ Երեւանում կյանքը 16 տոկոսով ավելի թանկ է, քան Թբիլիսիում։ Երեւանում կյանքը Բաքվի կյանքից թանկ է 30 տոկոսով եւ գրեթե մոտ է Մոսկվային։
«Շեշտվեցին գույքահարկի եւ այլ թանկացումները, կյանքի որակը Երեւանում շարունակում է թանկանալ։ 2024 թվականին Երեւանի բյուջեն 2025-ի համեմատ ավելացել է շուրջ 35 մլրդ դրամով՝ առաջին հերթին ի հաշիվ գույքահարկի թանկացման եւ այս անսահման տրվող շինթույլտվությունների»,- ասաց նա։
«Բառացիորեն անցած շաբաթ Երեւանի ավագանու նիստի ժամանակ մենք քննարկել ենք 2025 թվականի բյուջեի կատարողականը։ Եվ ամենաառանցքային ուղղություններում այս իշխանությունների թերացումներն եմ ուզում մեջբերել։ Անգամ եթե քաղաքացու գրպանը մտնելով՝ 35 մլրդ-ի չափով ավելացնում ես քաղաքի բյուջեն, եթե դու ապիկար ես կատարողականի առումով, շատ փողն էլ քեզ չի փրկել։ Հանգստի գոտիների եւ զբոսայգիների կառուցում եւ պահպանում՝ կատարողական 70 տոկոս, մայրուղիների եւ փողոցների վերակառուցում եւ հիմնանորոգում՝ 58,5 տոկոս։ Դրա համար էլ, երբ ձյուն է գալիս, հետո ավազ են ցանում, Երեւանը դառնում է կասկադյորական մրցավազքի փողոց։ Երեւանը կարիք ունի պատասխանատու իշխանության, Երեւանը կարիք ունի տարրական ամոթի զգացում ունեցող քաղաքապետի, երեւանցու առաջ հաշվետու, քաղաքականապես հասուն իշխանության։ Եվ այդ ճանապարհին «Մայր Հայաստանն» անցած երեք տարում ցույց է տվել, որ որտեղ ունի թիմ, այնտեղ կա կոմունիկացիա, արդյունք, առաջընթաց, հաշվետվողականություն։ «Մայր Հայաստանից» շատ ոչ մեկը չի ստիպել քաղաքային իշխանությանը գնալ, իր պարտականությունները կատարել ու քաղաքացուն ծառայություններ մատուցել»,- ասաց նա։
Կարդացեք նաև
Ռոզա ՀՈՎՀԱՆՆԻՍՅԱՆ
Էս թեմայով ռազմավարականը լավ խոսք ունի․ «Չյա կառովա բի նե միչալա, վաշա բի մալչալա»։ Այսինքն էն ինչը ձեր ժամանակով ձեզ են ասել, հիմա շուռ եք տալի՞ս․․․ ժողովուրդն էլ ձեր կարծիքով 10 տարուց ավել հիշողություն չունի։ Մի հատ դուրս եկեք ու քաղաքին նայեք, էդ այլանդակելը երբվանի՞ց է սկսվել։