Ինչպես տեղեկացրել ենք, Վարդան Ղուկասյանի մասնակցությամբ ենթադրյալ կաշառքի գործով դատական նիստին այսօր տեղի է ունեցել վկաների հարցաքննություն․ դատարանը լսել է այս գործով անցնող Գյումրու գլխավոր ճարտարապետ Հենրիկ Գասպարյանին ու գործարար Սևակ Գոմցյանին, որոնք մեղադրյալներ են։
Ըստ քրեական վարույթի, գլխավոր ճարտարապետը քաղաքապետ Վարդան Ղուկասյանի հետ ունեցած նախնական պայմանավորվածությամբ իրենց իշխանական և ծառայողական լիազորությունները օգտագործելով՝ գործարար Սևակ Գոմցյանին պատկանող առևտրի և սպասարկման համար նախատեսված հասարակական նշանակության ինքնակամ կառույցն օրինականացնելու նպատակով խոշոր չափերով՝ 4 միլիոն ՀՀ դրամ կաշառք են պահանջել։
Դատարանը արդարադատության շահից ելնելով՝ որոշում կայացրեց չտեսանկարահանել, ուղիղ եթեր չհեռարձակել վկաների ցուցմունքները, թույլատրեց ձայնագրել դրանք, սակայն հրապարակայնացնել բոլոր վկաների հարցաքննության ավարտից հետո։
Լրագրողները Վարդան Ղուկասյանի փաստաբան Արամայիս Հայրապետյանից հետաքրքրվեցին, թե ի՞նչ ցուցմունք են տվել նրանք։
Կարդացեք նաև
Արամայիս Հայրապետյանը տեղեկացրեց, որ Հենրիկ Գասպարյանը հրաժարվել է ցուցմունք տալ, նա ցուցմունք չի տվել նաև նախաքննության ընթացքում, իսկ գործարար Սևակ Գոմցյանը դատարանում ցուցմունք տալով՝ ասել է, որ Վարդան Ղուկասյանի հետ որևէ առնչություն չի ունեցել։
«Քանի որ չի ավարտվել հարցաքննությունը, փորձենք շրջանցել բովանդակության վերարտադրությունը, Սևակ Գոմցյանի ասածի իմաստն այն է, այդ նյութի հետ կապված ինքը և Վարդան Ղուկասյանը որևէ շփում չեն ունեցել, ավելին՝ ինքը Վարդան Ղուկասյանին անձնապես չի էլ ճանաչում»,-ասաց փաստաբանը։
Նունե ԱՐԵՎՇԱՏՅԱՆ
