Եվրոպական միության աջակցությամբ Հայաստանի ստանդարտացման եւ չափագիտության ազգային մարմնի էլեկտրական մեծությունների եւ պտտման մոմենտի տրամաչափարկման նորաստեղծ լաբորատորիաները, ինչպես նաեւ ճնշման տրամաչափարկման լաբորատորիաները հաջողությամբ ստացել են միջազգային հավատարմագրում։ Այս մասին մարտի 23-ին հայտարարել է Հայաստանում ԵՄ պատվիրակությունը։
«Եվրոպական միությունը հպարտ է աջակցել Հայաստանում որակի ենթակառուցվածքի ազգային համակարգի ամրապնդմանը՝ նպաստելով տեղական ընկերությունների մրցունակության բարձրացմանը եւ կայուն տնտեսական աճին», – նշել է Պատվիրակությունն իր մամուլի հաղորդագրության մեջ՝ հավելելով, որ միջազգային հավատարմագրման շնորհիվ «հիմնական տրամաչափարկման ծառայությունները կդառնան առավել մատչելի, հուսալի եւ տնտեսապես շահավետ Հայաստանի ձեռնարկությունների համար»։
Պատվիրակությունը նաեւ նշել է, որ այս առաջընթացը «կարեւոր քայլ է» ԵՄ–Հայաստան Համապարփակ եւ ընդլայնված գործընկերության համաձայնագրի (ՀԸԳՀ) կիրարկման գործում, որը աջակցում է ԵՄ չափանիշներին կանոնակարգերի մոտարկմանը, բարելավում շուկայի նկատմամբ վերահսկողությունը եւ նպաստում հայկական արտադրանքի մուտքին միջազգային շուկաներ։
EU NEIGHBOURS east
