Դուք Հայաստանում եք շատ հետաքրքիր ժամանակաշրջանում: Երկու ամիս անց Հայաստանում կայանալու են խորհրդարանական ընտրություններ: Միեւնույն ժամանակ, մենք գտնվում ենք աշխարհաքաղաքական իրադարձությունների զարգացումների կիզակետում:
Այս մասին ասել է ՀՀ Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանը Բելգիայի Թագավորության խորհրդարանի Բելգիա-Հայաստան բարեկամական խմբի ղեկավար Էլս Վան Հոֆի գլխավորած պատվիրակության հետ հանդիպման ընթացքում:
Հանդիպումը տեղի է ունեցել մարտի 30-ին, որին մասնակցել են նաեւ Արտաքին հարաբերությունների մշտական հանձնաժողովի անդամներ Հասմիկ Հակոբյանը, Մարիա Կարապետյանը եւ Էդուարդ Աղաջանյանը:
Սարգիս Խանդանյանն արժեւորել է Բելգիայի Թագավորության խորհրդարանի Բելգիա-Հայաստան բարեկամական խմբի հետ ակտիվ ու արդյունավետ փոխգործակցությունը:
Կարդացեք նաև
Էլս Վան Հոֆը, շնորհակալություն հայտնելով ջերմ ընդունելության համար, նշել է, որ Հայաստանի վերաբերյալ բազմաթիվ քննարկումներ են տեղի ունեցել, եւ ներկայում էլ իրենք հետաքրքրված են թե՛ Հայաստանում, թե՛ տարածաշրջանում տեղի ունեցող զարգացումներով:
Սարգիս Խանդանյանը նշել է, որ բարեկամական խմբի անդամների հետ վերջին հանդիպումից հետո բազմաթիվ իրադարձություններ եւ փոփոխություններ են տեղի ունեցել:
Արտաքին հարաբերությունների մշտական հանձնաժողովի անդամները պատասխանել են հյուրերի հարցերին` ներկայացնելով մանրամասներ Հայաստանի եւ Ադրբեջանի միջեւ խաղաղության գործընթացի, «TRIPP ուղի» նախագծի, ինչպես նաեւ ընտրական գործընթացի վերաբերյալ:
Անդրադարձ է կատարվել Հայաստան-Եվրոպական միություն փոխգործակցությանը, Հայաստանում ժողովրդավարության զարգացմանը, մարդու իրավունքների պաշտպանությանը եւ օրենքի գերակայության ամրապնդմանը, տարածաշրջանային զարգացումներին ու անվտանգությանը:
ԱԺ
