Ազգային Ժողովի 2026 թվականի հունիսի 7-ի հերթական ընտրություններին ընդառաջ «Անկախ դիտորդ» դաշինքը ուսումնասիրել է Հանրային հեռուստատեսության Առաջին լրատվական ալիքի Youtube հարթակը։
Որպես ուսումնասիրության ժամանակահատված ընտրվել է 2026 թվականի մարտի 30 – մայիսի 7-ը ՝ նախընտրական քարոզչությանը նախորդող ժամանակահատվածը։
Ուսումնասիրության արդյունքում առանձնացվել է քաղաքական գործընթացները կամ դերակատարներին լուսաբանող բնույթի 284 հրապարակում, որոնցից 34-ը՝ Լուրերի ամփոփիչ թողարկումների հրապարակումներն են Youtube հարթակում։
284 հրապարակումից 206-ը ենթադրում են պետական մարմինների (Կառավարություն, Ազգային ժողով, նախարարություններ և այլն) գործունեության լուսաբանում և այլ հաղորդումներ, որոնք կախված չեն խմբագրական ընտրությունից կամ քաղաքական սուբյեկտներից։
Կարդացեք նաև
Մյուս 78 հրապարակումները քարոզչական բնույթի են՝
34 հրապարակում (12%) կրել են քարոզչական բնույթ կամ պարունակել են քարոզչական տարրեր, որոնցից 24-ում հիշատակվել է «Քաղաքացիական պայմանագիր» կուսակցությունը, 6-ում՝ «Ուժեղ Հայաստան» կուսակցությունը, 5-ում՝ «Հայաստան» դաշինքը, 3-ում՝ «Միասնության թևեր» կուսակցությունը, 3-ում՝ «Պատիվ ունեմ» խմբակցությունը, 2-ում՝ ԲՀԿ-ն, 2-ում՝ «Հանուն Հանրապետության»-ը, և մեկական անգամ՝ Քրիստոնեա-ժողովրդավարական կուսակցությունը, «Լուսավոր Հայաստան»-ը, «Դեմոկրատական այլընտրանք»-ը, «Բոլորին դեմ եմ»-ը։
44 հրապարակում (15.5%) չեն հանդիսացել անմիջական քարոզչություն, բայց ունեցել են քարոզչական ենթատեքստ, որոնցից 39-ում հիշատակվել է ՔՊ-ն, 13-ում՝ «Ուժեղ Հայաստան»-ը, 6-ում՝ «Հայաստան» դաշինքը, և 1-ական հրապարակումներում՝ «Միասնության թևերը»-ը, ԲՀԿ-ն և «Հանուն Հանրապետության»-ը։
Դիտարկման արդյունքները վկայում են, որ ուսումնասիրված ժամանակահատվածում ալիքի քաղաքական բովանդակության մեջ նկատվում է քարոզչական և քարոզչական ենթատեքստ ունեցող նյութերի զգալի մասնաբաժին, որը գերակշռող չափով առնչվում է «Քաղաքացիական պայմանագիր» կուսակցությանը։ Միաժամանակ արձանագրվել է, որ ընդդիմադիր ուժերի լուսաբանումը ունեցել է առավելապես բացասական՝ հակաքարոզչական շեշտադրում։
Նշենք, որ թեև նշված ժամանակահատվածը չի կարգավորվում «Ընտրական օրենսգրքի» նախընտրական քարոզչության ժամանակահատվածի համար նախատեսված սահմանափակումներով, այնուամենայնիվ, «Տեսալսողական մեդիայի մասին» օրենքի 22-րդ հոդվածի 5-րդ մասի համաձայն՝ հանրային հեռարձակողները ղեկավարվում են օբյեկտիվության, ժողովրդավարության, անկողմնակալության, բազմազանության, բազմակարծության սկզբունքներով, իսկ նույն հոդվածի 6-րդ մասի 3-րդ մասի «ա» ենթակետի համաձայն՝ պարտավոր են հասարակական առավել հնչեղություն ունեցող տեղեկատվությունը ներկայացնելիս տրամադրել թե՛ խնդրի կամ հարցի վերաբերյալ պաշտոնական հաղորդագրությունը (տեղեկատվությունը), թե՛ կարծիքների բազմազանությունը։
Հելսինկյան քաղաքացիական ասամբլեայի Վանաձորի գրասենյակ
