«Որոշումները, որպես կանոն, դատարանում չեն կայացվում, կայացվում են այլ վայրում և թելադրվում դատական իշխանությանը, ինչը փաստվում է արդեն բազմաթիվ միջազգային կազմակերպությունների կողմից»,- ԲՀԿ առաջնորդ Գագիկ Ծառուկյանի գործով դատական նիստի ժամանակ, դատարանի բակում, լրագրողների հետ զրույցում ասաց ՀՀԿ գործադիր մարմնի անդամ Հայկ Մամիջանյանը։
Խոսելով ԲՀԿ առաջնորդի՝ այս դատական նիստի տարբերությունների մասին նախորդներից, Հայկ Մամիջանյանն ասաց, որ մի քանի իրողություն է փոխվել․ «Առաջին՝ հրապարակվել է պարոն Ծառուկյանի անմեղությունը ևս մեկ անգամ փաստագրություն, որի խոսակցությունից ակնհայտ երևում է, որ գործը շինծու է։ Երկրորդ՝ պարոն Ծառուկյանի փաստաբանի՝ Երեմ Սարգսյանի նկատմամբ ապօրինի պատիժը, այսպես ասած, արգելքը պաշտպանելու պարոն Ծառուկյանին՝ նույնպես վերացվել է, և փաստաբանների միջազգային կազմակերպություններ դրա մասին բարձրաձայնել են։ Եվ թերևս ամենակարևորը՝ ԵԽԽՎ զեկույցը, որտեղ հստակ նշվում է, որ առկա են եղել ընտրովի արդարադատության օրինակներ, իրավապահ համակարգի օգտագործումը ընդդիմադիրների դեմ, և հստակ նշվում է, որ Գագիկ Ծառուկյանի ղեկավարած «Բարգավաճ Հայաստան» կուսակցությունը ապօրինաբար է զրկվել մանդատներից, դրա հիմնավորումները թերի են»։
Թե այս իրողությունները ի՞նչ ազդեցություն կունենան գործի վրա, Հայկ Մամիջանյանը չի ցանկանում կանխատեսումներ անել․ «Փաստն այն է, որ ոչ միայն Հայաստանում, ամբողջ հասարակական-քաղաքական դաշտը հստակ ֆիքսում է, որ պարոն Ծառուկյանի և մնացած բոլոր մեր պայքարի ընկերների գործերը շինծու են և քաղաքական։ Արդեն նույնիսկ այն շրջանակները, որոնք աչք էին փակում կամ փորձում էին չխոսել Հայաստանում տիրող ապօրինություններից՝ ոչ մեզ համար բավարար միանշանակ ձևակերպումներով, սկսել են դրա մասին խոսել»։
Մանրամասները՝ տեսանյութում
Կարդացեք նաև
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
