Այսօր` մարտի 15-ին, լրանում է երիտթուրքերի ներքին գործերի նախարար և Հայոց Ցեղասպանության գլխավոր կազմակերպիչ Թալեաթ փաշայի սպանության 91-րդ տարին, ում գնդակահարել է ազգային հերոս Սողոմոն Թեհլերյանը: Նա առաջին եւ միակ մարդն է, ում սպանության համար դատավորներն արդարացրել են:
1921 թվականի դատավարության ժամանակ երդվյալներից մեկը հայտարարել է. «Պատվով ու խղճով վկայում եմ, որպես երդվյալների որոշում, մեղավոր է ամբաստանյալ Սողոման Թեհլերյանը 1921-ի մարտի 15-ին Շառլոտենգուրգում մի մարդ Թալեաթ փաշայի սպանության մեջ. ոչ»:
«Նոր Միտք- Ռենեսանս» երիտասարդական համահայկական կազմակերպությունը (ԵՀԿ) այսօր համախմբել էր հայ երիտասարդներին եւ երթ կազմակերպել Ազատության հրապարակի` Պետական Օպերայի բակից մինչեւ Անկախության հրապարակ: Կազմակերպիչ Գոռ Գեղամյանն ասում է, որ ցանկացած երիտասարդ պետք է իր մեջ ունենա Սողոմոն Թեհլերյանի կերպարը եւ ցանկացած պահի պատրաստ լինի պաշտպանել իր հայրենիքը:
«Մենք այսօր 91-րդ տարեդարձին կազմակերպեցինք այս երթը, որպեսզի հայ երիտասարդին տեղեկացնենք ու հիշեցնենք Սողոմոն Թեհլերյանի մասին: Այսօր իրոք մեծ օր է, քանի որ 1.5 մլն. հայերի սպանած Թալեաթն ստացավ իրեն արժանի պատիժը: Մենք բոլորս պետք է հպարտանանք նման հայորդի ունենալու համար»,- ասում է նա:
Սանասար Գրիգորյանը, ով «Պատանի պատմագետների» ակումբի ղեկավարն է, հայտնում է. «Հայ դատն աջացել է 1915 թ. ցեղասպանությունից անմիջապես հետո, երբ համաշխարային դատավորներն որոշեցին ոճրագործներին դատել` հանձին Թալեաթ փաշայի, Ջեմալ փաշայի եւ մնացածների: Հայ դատի ներկայացուցիչները հիմնականում դաշնակցականներ էին, որոնք համախմբվեցին «Նեմեսիս» խմբակցության շուրջ»:
Հիշեցնենք, որ «Նեմեսիս» խմբակցությունը կազմվել է 1921 թվականին հայ քաջազունիներ Սողոմոն Թեհլերյանի, Արշավիր Շիրակյանի, Արամ Երկանյանի եւ այլոց կողմից:
Մասնակիցներից Լիլիթ Պետրոսյանը, ով ԵՊՀ իրավագիտության ֆակուլտետի ուսանողուհի է ասում է, որ ոչ միայն եվրոպական երկրները, այլեւ մենք ինքներս պետք է քաջ գիտակցենք, որ մենք կորուսյալ հայրենիք ունենք ու պետք է վերադարձնենք այն:
Երթին մասնակցում է նաեւ Համազասպ պապը, ով միակ տարեց մարդն է հավաքվածների մեջ: «Պետք է հետեւողական լինել, մեզ մոտ մի հատ կրակում են ու մի կողմ քաշվում: Եթե այսօր ունենայինք մի տասը հոգի Թեհլերյան, մենք մի քայլ առաջ կգնայինք, կառավարությունն էլ կանոնավոր կլիներ»,- ասում է Համազասպ Ասլանյանը:
Երթն ուղեկցվում էր «Գինի լից» և «Նժդեհի երգը» երգերով` մեծ ոգեւորություն առաջացնելով անցորդների մոտ:
Ռուբինա Սաֆարյան
