Հայաստանի ամերիկյան Համալսարանում մեկնարկել է վերցօրյա միջազգային համաժողով, որին մասնակցում են աշխարհի 20 երկրներից 60 գիտնականներ: Հայաստանում են գտնվում Անգլիայի, Բելգիայի, ԱՄՆ-ի, Հոլանդիայի և այլ երկրների լավագույն համալսարանների ականավոր գիտնականներ ֆիզիկայի, հաշվողական համակարգերի, գիտության և այլ ոլորտներից: Բացի այն, որ համաժողովի ընթացքում աշխարհի տարբեր երկրների գիտնականները հնարավորություն կունենան շփվել միմյանց հետ, փոխանակել իրենց փորձն և գիտելիքները, միևնույն ժամանակ Ամերիկյան, այնպես էլ ՀՀ տարբեր բուհերի ուսանողներ հնարավորություն կունենան ունկնդրել ականավոր գիտնականների դասախոսությունները:
Ամերիկայի Նորթ Դովատա պետական համալսարանը ներկայացնող Ալեքսանդր Վագները, որն ուսումնասիրություններ է կատարում կաթիլների փոխգործության, տաք ու սառը օդի, հեղուկ դինամիկ միջավայրների վերաբերյալ, կարևորեց նման համաժողովների կազմակերպումը և նշեց. «Շնորհակալ եմ, որ մեզ հրավիրել են այս գեղեցիկ երկիր, այն ինձ շատ է դուր գալիս: Այսպիսի գիտաժողովների կարևորությունն այն է, որ գիտնականներն իրար հանդիպում են և զրուցում, փոխանակում մտքեր: Անշուշտ, գիտնականները միշտ էլ հոդվածներ կարող են տպագրել ամսագրերում, բայց դա նույնը չէ, ինչ դեմառդեմ հանդիպելն ու գաղափարներ փոխանակելը: Նմանօրինակ համաժողովները նաև լավ առիթ են հայ գիտնականների հետ հանդիպելու համար, քանի որ նրանց հետ նմանօրինակ շփումներ առանձնապես շատ չենք ունեցել»:
Aravot.am-ը Հայաստանում Ամերիկյան համալսարանի նախագահ Բրյուս Պողոսյանից հետաքրքրվեց՝ հայ գիտնականների հետ հանդիպումների կազմակերպման առումով խնդիրներ կա՞ն, որ արտերկրից ժամանած գիտնականը հատուկ շեշտեց այդ հանգամանքը: Նա պատասխանեց. «Բնավ որևէ խնդիր չկա, քանի որ ամեն երկրում, որտեղ կազմակերպվում են այսպիսի գիտաժողովները, նույն բավարարվածությամբ են տեղի գիտնականները արտերկրի մասնագետների հետ շփվելու հնարավորությունը վայելում: Նման ցանցային աշխատանքը ամենուր նույնն է»:
Հետաքրքրվեցինք՝ ի՞նչ են ցույց տալիս արտերկրի մասնագետների հետ շփումները, արդեն ուրվագծվու՞մ են գիտության բնագավառի ներկայիս առաջնահերթությունները: Բ. Պողոսյանը պատասխանեց. «Սեպտեմբերից Ամերիկյան համալսարանում սկսելու ենք հաշվողական գիտությունների բնագավառում բակալավրիատի ծրագրի իրականացումը, որը թույլ կտա գիտության ավանդական ուժեղ կողմերը համադրել նորագույն ուղղությունների հետ»:
Կարդացեք նաև
Տաթև ՀԱՐՈՒԹՅՈՒՆՅԱՆ
