Հայաստանյան գրահրատարակչական ոլորտի առաջատար «Անտարես» մեդիա հոլդինգի նախագահ Արմեն Մարտիրոսյանը, որը գրքի միջազգային հեղինակավոր ցուցադրությունների (Ֆրանկֆուրտ, Լոնդոն, Փարիզ եւ այլն) մեծ փորձ ունի, օրերս վերադարձել է Թբիլիսիում կայացած ավանդական դարձած հերթական միջոցառումից եւ հայտնվել «շոկի» մեջ:
Պարոն Մարտիրոսյանին այս վիճակի է հասցրել այցելուների, հատկապես վրացիների վերաբերմունքը գրքի նկատմամբ: «Առավոտի» հետ զրույցում նա նշեց, որ «Անտարեսի» գերխնդիրն է եղել ներկայացնել հայաստանյան պոլիգրաֆիական որակը, այլ շուկաներից էլ պատվերներ ստանալը: «Թբիլիսիում եղած օրերին կարծես ոչ միայն Վրաստանի, այլեւ աշխարհով մեկ սփռված վրացիներն էին այցելում փառատոնին: Հենց տեղում կնքեցինք պայմանագիր Դաթո Տուրաշվիլիի «Ջինսի սերունդ» վեպի թարգմանության եւ հրատարակման համար: Այս երկը հիմնված է իրական դեպքերի վրա. 1980-ականներին Մոսկվայում վրացի տեռորիստները ցանկացել են ինքնաթիռ առեւանգել՝ ուղղությունը շեղելով դեպի արեւմուտք… Հայ գրողներից էլ Գուրգեն Խանջյանն ու Արամ Պաչյանը կթարգմանվեն վրացերեն ու կհրատարակվեն»,- հայտնեց մեր զրուցակիցը: Պարոն Մարտիրոսյանը հավելեց, որ միջազգային հետազոտությունների տվյալներով՝ միջին վրացին տարվա ընթացքում 19 անգամ ավելի շատ գիրք է գնում, քան հայաստանցին:
Նա ափսոսում է, որ Հայաստանը կորցրել է իր նաեւ հոգեւոր տարածքները, ինչը գալիս է ամեն ինչի հանդեպ հանդուրժող լինելուց:
Պարոն Մարտիրոսյանը Թբիլիսի-Երեւան մայրուղու 35-րդ կմ-ում՝ Մառնեուլիի շրջանում առաջին անգամ էր նկատել, որ մի բենզալցակայանի վերեւում կողք կողքի տեղադրված են Հայաստանի, Ռուսաստանի, Ադրբեջանի, Վրաստանի դրոշները (լուսանկարում): Ըստ մեր զրուցակցի՝ դա հետաքրքիր մարքեթինգային լուծում է, որովհետեւ տեսնելով քո դրոշը, այդ տեղը համարում ես հարազատ, կարծես մինի դեսպանատուն ու հանգիստ այցելում ես՝ առանց կաշկանդվելու:
Կարդացեք նաև
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
04.06.2014
Ախր էս մարդը հեչ կապ չունի գրականության հետ: