Դեռեւս 10 օր առաջ Շիրակի մարզպետ Ֆելիքս Ցոլակյանն աշխատանքային փակ խորհրդակցություն էր անցկացրել մարզի դպրոցների տնօրենների հետ՝ հրահանգելով զերծ մնալ դրամահավաքությունից: Աշխատանքային խորհրդակցությունից հետո մարզպետարանի հասարակայնության հետ կապերի և լրատվության բաժինը տարածեց մամլո հաղորդագրություն, որտեղ մասնավորապես գրված էր. «Ֆելիքս Ցոլակյանը, կարևորելով «Վերջին դաս» միջոցառման բարձր մակարդակով անցկացումը, խստորեն հրահանգավորել է զերծ մնալ դրամահավաքությունից: «Իմ հրահանգը պետք է յուրաքանչյուրիդ համար դիտվի որպես անխախտ գործելակերպի ցուցում, չեմ հանդուրժելու դրամահավաքի ցանկացած դեպք, ընդունեք սա որպես նախազգուշացում և աշխատեք «Վերջին դասը» կազմակերպել համեստ ու բովանդակալից»,-ասել է Շիրակի մարզպետը»:
Սակայն Ֆելիքս Ցոլակյանը իր հրահանգից անմիջապես հետո Արթիկի տարածաշրջանի Հոռոմ գյուղից ահազանգ է ստացել այն մասին, որ այստեղի դպրոցում սկսվել է դրամահավաքությունը: Այս փաստն այնպես էր զայրացրել Շիրակի մարզպետին, որ երեկ մարզպետարանի դահլիճում Տարածքային կառավարման և արտակարգ իրավիճակների նախարար Արմեն Երիցյանի, մարզի բոլոր գյուղապետերի ու լրատվամիջոցների ներկայությամբ Ֆելիքս Ցոլակյանը խայտառակեց Հոռոմի գյուղապետ Աշոտ Պասկևիչյանին:
Բանն այն է, որ մարզպետը խոսում էր կրթական ոլորտի մասին, սակայն նրան զուգահեռ տեղում իր գործընկերների հետ զրույցի էր բռնվել երիտասարդ գյուղապետը: Մարզպետը զայրացավ՝ նրան շշպռելով դպրոցում կատարված դրամահավաքի համար: «Դրամահավաքության մասին մի ահազանգ ստացել ենք արդեն, դրա համար էլ Աշոտը նստած կողքինի հետ խոսում է, Հոռոմի գյուղապետի մասին է խոսքս… Ես ասել եմ ու կրկնում եմ՝ ընդհանրապես փակվի էդ հարցը, ընդհանրապես էդպիսի բան չլինի, պետք չէ, հետո էդ քեֆերը մի դրդեք դուք, ծնողներին ասեք պետք չեն: Շատ չափավոր, շատ նորմալ կարելի է անցկացնել և՛ դպրոցում, և՛ համայնքում եղած որևէ օբյեկտում, բայց առանց ճոխությունների, որ անում են սովորաբար», -ասաց Ֆելիքս Ցոլակյանը:
Մանրամասները՝տեսանյութում.
Կարդացեք նաև
Նունե ԱՐԵՎՇԱՏՅԱՆ
Լուսանկարները մարզպետարանի պաշտոնական կայքից
