Ավստրիայի Ինսբրուք քաղաքում 2016թ. ապրիլի 24-ին՝ Հայոց ցեղասպանության 101-րդ տարելիցի կապակցությամբ, նախատեսվում է հուշարձանի բացում, որը դժգոհություն է առաջացրել այդ երկրում ապրող թուրքերի շրջանում։ Այս մասին տեղեկացնում է թուրքական «Հաբերլեր» լրատվական կայքը։
Ապրիլի 24-ին Հայոց ցեղասպանության զոհերի հիշատակը վառ պահելու համար Ինսբրուքի քաղաքապետարանի կայացրած որոշումը, որի համաձայն քաղաքում կկառուցվի հայկական հուշարձան, դժգոհություն է առաջացրել Ավստրիայի թուրքական համայնքում, որի ներկայացուցիչներն, ի նշան բողոքի, երթ են անցկացրել։ Թուրքերի կազմակերպած երթը մեկնարկել է Ինսբրուքի համալսարանի մոտից և ավարտվել քաղաքի հրապարակներից մեկում։
Ավստրիայում ապրող թուրքերի կազմակերպած երթին մասնակցել է նաև Թուրքիայում իշխող «Արդարություն և զարգացում» կուսակցության Ստամբուլից ընտրված պատգամավոր Մեթին Քյուլյուքը։
Տեղեկացնենք, որ 2016թ. ապրիլի 24-ին Հայոց ցեղասպանության զոհերի հիշատակին նվիրված հուշարձան կառուցելու որոշումը Ինսբրուքի քաղաքապետարանը կայացրել է մեկ ամիս առաջ։
