Այս գիշեր վթարի ենթարկված Մոսկվա-Երևան ավտոբուսի վարորդները վերջերս պատասխանատվության էին ենթարկվել՝ ճանապարհային երթևեկության կանոնները խախտելու համար: Այս մասին հաղորդում է ՏԱՍՍ-ի թղթակիցը դեպքի վայրից:
Մասնավորապես, վարորդներից մեկը վարչական պատասխանատվության էր ենթարկվել 2016թ. ապրիլին՝ ամրագոտին չկապելու համար: Երկրորդ վարորդը տուգանվել էր Մոսկվայի տարածքում սահմանված արագությունը գերազանցելու համար:
Ոստիկանությունից հայտնել են, որ Մոսկվայից Երևան երթուղին վարորդներին տրվել էր հոկտեմբերի 2-ին Երևանից: Ավտոբուսը պետք է շարժվեր Երևան-Թբիլիսի-Մոսկվա և Մոսկվա-Թբիլիսի Երևան երթուղով:
Վթարը տեղի է ունեցել Բեսլանից ոչ հեռու՝ դաշնային մայրուղու վրա, որը լավ լուսավորված է: Ոստիկանները նկատել են, որ ավտոբուսը բախվել է կայանած բեռնատարին: Նրանք կարծում են, որ առավոտյան ժամը 4-ին լուսավորված ճանապարհի վրա բեռնատարը չնկատել անհնար էր:
Կարդացեք նաև
Ավելի վաղ ՀՀ տրանսպորտի, կապի և տեղեկատվական տեխնոլոգիաների նախարարությունից տեղեկացրել էին, որ
հոկտեմբերի 14-ին՝ Մոսկվայի ժամանակով առավոտյան ժամը 04:30-ի սահմաններում, Հյուսիսային Օսիայիում` Բեսլան քաղաքից 6 կմ հեռավորության վրա, վթարի է ենթարկվել ոչ կանոնավոր ուղևորափոխադրում իրականացնող Մոսկվա-Երևան ավտոբուսը: Նախնական տվյալներով` վթարի հետևանքով կա 5 զոհ, 27 վիրավոր:
Lenta.ru-ն տեղեկացնում է, որ վիրավորների թվում կա 10-15 տարեկան 4 երեխա: Ընդհանուր առմամբ ավտոբուսում եղել է 52 մարդ:
Հյուսիսային Օսիայի առողջապահության փոխնախարար Տատյանա Ցիդաևան հստակեցնել է, որ հիվանդանոցում գտնվում է 20 մարդ: «Նրանցից երկուսը գտնվում են ծանր վիճակում: Երկու չափահասների վիրահատում են շտապ օգնության կլինիկական հիվանդանոցում»:
Գործակալությունը նշում է, որ Բեսլանի մշակույթի տանը բացվել է ժամանակավոր տեղակայման կետ, որտեղ տարբեր տվյալներով գտնվում է 13-14 ուղևոր:
Պատրաստեց՝ Վիկտորյա ԱՆԴՐԵԱՍՅԱՆԸ
