Դեկտեմբերի 12-ին Մարդու իրավունքների Եվրոպական դատարանի Մեծ պալատը Ղարաբաղյան հակամարտության վերաբերյալ երկու դատավճիռ է հրապարակել:
Լեռնային Ղարաբաղի հակամարտության քաղաքական լուծման բացակայության պայմաններում դատարանը որոշեց հայցվորներին արդար փոխհատուցում տրամադրել գումարի տեսքով:
«Սարգսյանն ընդդեմ Ադրբեջանի» գործով ՄԻԵԴ-ը Ադրբեջանի կառավարությանը պարտավորեցրեց հայցվորին վճարել 5000 եվրո՝ որպես նյութական ու ոչ նյութական վնասների փոխհատուցում, և 30.000 եվրո՝ դատական ծախսերի համար: Հայ փախստականի գործում նշված է, որ վերջինս 1992 թվականին՝ Լեռնային Ղարաբաղի հակամարտության ժամանակ, հարկադրված լքել է Ադրբեջանի վերահսկողության տակ գտնվող Շահումյանի շրջանի Գյուլիստան գյուղի իր տունը: Այդ ժամանակից ի վեր նա չի կարողանում վերադառնալ իր գյուղ և տնօրինել ունեցվածքը:
«Չիրագովը և մյուսները ընդդեմ Հայաստանի» գործով ՄԻԵԴ-ը Հայաստանի կառավարությանը պարտավորեցրեց վճարել 5000-ական եվրո՝ որպես նյութական և ոչ նյութական վնասի փոխհատուցում յուրաքանչյուր հայցվորին և ընդհանուր 28,642.87 ֆունտ ստերլինգ՝ դատական ծախսերի համար: Դատական գործն առնչվում էր ադրբեջանցի 6 փախստականի, ովքեր ի վիճակ չեն վերադառնալու Լաչինում գտնվող իրենց տները և վերականգնել ունեցվածքը, որտեղից հեռացել են 1992 թվականին ղարաբաղյան հակամարտության պատճառով:
Դատարանը ընդգծել է, որ երկու պետությունները պետք է Լեռնային Ղարաբաղի հակամարտության վերաբերյալ լուծում գտնեն:
Պատրաստեց` Վիկտորյա ԱՆԴՐԵԱՍՅԱՆԸ