ՉԿԱՅԱՑԱԾ ՍԵՐՆԴԱՓՈԽՈՒԹՅՈՒՆ
Բաքվի համալսարանի պրոֆեսոր Չինգիզ Իսմայլովի համոզմամբ, Ադրբեջանի բարձրագույն ուսումնական հաստատությունները սերնդափոխության կարիք են զգում: «Panorama.am»-ի հաղորդմամբ, այս մասին գրում է «Zerkalo» պարբերականը: «Բուհերի ամբիոններում աշխատում են դասախոսներ, ովքեր արդեն 70-80 տարեկան են»,- նշել է պրոֆեսորը: Ընդ որում, այդ տարիքի դասախոսների թիվը շատ մեծ է: Իսմայլովի դիտարկմամբ՝ Բաքվի պետական համալսարանի ֆակուլտետների մեծ մասում դասավանդում են այնպիսի տարեց մանկավարժներ, որոնց համար երբեմն ավելի կարեւորը ոչ թե դասավանդվող առարկայի պարզաբանումն է, դասախոսության կամ սեմինարի անցկացումը, այլ ուղղակի դասը ավարտին հասցնելը: Այս ամենից հետո կարծես թե ավելորդ է խոսել մատուցվող գիտելիքի բավարար մակարդակի կամ որեւիցե այլ գործոնների մասին:
Ադրբեջանի կրթության նախարարության տրամադրած տեղեկությունների համաձայն, Բաքվի պետական համալսարանի մանկավարժների 80 տոկոսի տարիքը անցնում է 70-ից:
ՈՐ ԴՊՐՈՑ ԳՆԱՆ
Ստամբուլի հայոց պատրիարքարանի Կրոնական ժողովի ատենապետ Արամ Սրբազանը Թուրքիայի վարչապետի հետ վերջերս ունեցած հանդիպման ընթացքում բարձրացրել է ներկայումս «փախստականի» կարգավիճակով Թուրքիայում ապրող հայաստանցիների զավակների միջնակարգ կրթության հարցը: Ինչպես գրում է «Նոյյան տապանը»՝ «Մարմարա»-ին հղում անելով, Արամ Սրբազանը նշել է, որ վտանգավոր են դառնում այն երեխաները, ովքեր դպրոց գնալու հնարավորություն չունեն, եւ վարչապետին խնդրել է, որպեսզի թույլատրվի հայաստանցիների զավակներին սովորել հայկական վարժարաններում:
Թուրք վարչապետը ի պատասխան ասել է, որ ինքը տեղյակ չէ օրենքներին, եւ որ կրթության նախարարին պետք է խնդրի զբաղվել այս հարցով ու հնարավորության դեպքում լուծում գտնել: