Դեսպան Քվինն այսօր հանդիպեց խորհրդարանական ընդդիմության ներկայացուցիչներին՝ լսելու և քննարկելու երկկողմ հարաբերությունների լայն շրջանակին առնչվող հարցեր, այդ թվում՝ ԱՄՆ աջակցությունը Հայաստանի ժողովրդավարական զարգացմանը, մարդու իրավունքներին և խաղաղության գործընթացին:
Դեսպանն ընդգծեց ԱՄՆ աջակցությունը Հայաստանի ինքնիշխանությանն ու տարածքային ամբողջականությանը և ողջունեց Հայաստանի և Ադրբեջանի միջև վերջերս ձեռք բերված համաձայնությունը Ալմա Աթայի հռչակագիրը սահմանների դելիմիտացիայի համար որպես հիմք ընդունելու վերաբերյալ:
ՀՀ-ում ԱՄՆ դեսպանատուն
Կարդացեք նաև
Ընդդիմադիր պատգամավորների տարածած հաղորդագրության մեջ ասվում է.
«Այսօր «Հայաստան» և «Պատիվ ունեմ» խմբակցությունների պատգամավորները, օրերս ՀՀ-ում հավատարմագրված դեսպաններին հղած հայտարարության շրջանակներում, հանդիպեցին ՀՀ-ում ԱՄՆ արտակարգ և լիազոր դեսպան Քրիստինա Քվինի հետ: Ընդդիմադիր պատգամավորները դեսպանի հետ զրույցում հայտնել են իրենց մտահոգությունը Հայաստանում ժողովրդավարական արժեքների և ազատությունների կտրուկ նահանջի մասին, շեշտել՝ ոստիկանական բռնությունների աճը, խոսքի ազատության և խաղաղ հավաքների իրավունքը սահմանափակելու դեպքերը:
Պատգամավորներն ընդգծել են նաեւ դատական համակարգը ամբողջությամբ գործադիրի վերահսկողության տակ վերցնելու անթույլատրելիությունը: Դեսպանի ուշադրությունն են հրավիրել նաև տարբեր գործերով խափանման միջոց ընտրված կալանքների անթույլատրելի վիճակագրության վրա, ինչի արդյունքում հորինված մեղադրանքներով բազմաթիվ ընդդիմադիր քաղաքական գործիչներ և խաղաղ հավաքների մասնակիցներ, քաղաքական բանտարկյալներ այժմ գտնվում են բանտերում:
Պատգամավորները ԱՄՆ դեսպանին են ներկայացրել նաև սահմանազատման և սահմանագծման, իսկ իրականում՝ միակողմանի զիջումների և կապիտուլյացիայի գործընթացի անթույլատրելիությունը, բարձրաձայնել են Արցախի հանրապետությունից բռնի տեղահանվածների իրավունքների պաշտպանությունն ու Հայաստանում ունեցած սոցիալական խնդիրների, ինչպես նաև արցախահայության հավաքական վերադարձի իրավունքին առնչվող հարցերը»: