Այն հասանելի է ոչ միայն Մաքարտնիին եւ Սթինգին
![\"\"](\"https://www.aravot.am/2011/aravot_arm/June/29/p22.jpg\")
Շմավոն Գրիգորյանը եւ Սիլվիա Բաումանը:
«Առավոտը» 2010թ. վերջին ներկայացրել էր Ցյուրիխի կոնսերվատորիայի ուսանող, ֆագոտահար Շմավոն Գրիգորյանի միջնորդությամբ Ազգային օպերային թատրոնում հյուրախաղերի եկած ճանաչված դիրիժոր Մարկ Կիսոցցիին: Այժմ էլ հայ երաժշտի նախաձեռնությամբ Երեւանի օպերային թատրոնի հաջորդ հյուրն է եվրոպական երաժշտական ուսուցման ասպարեզում Ալեքսանդրյան մեթոդ-տեսության հայտնի մասնագետ Սիլվիա Բաումանը, ով Ցյուրիխի կոնսերվատորիայում Շ. Գրիգորյանի դասախոսն է: Ֆագոտահարը մեզ տեղեկացրեց, որ տիկին Բաումանը նաեւ հիանալի ֆլեյտահարուհի է:
«Առավոտի» հետ զրույցում Ս. Բաումանը ներկայացրեց Ալեքսանդրյան մեթոդի անհրաժեշտությունն ու կարեւորությունը. «20-րդ դարի սկզբներին ավստրալացի դերասան Ֆրեդերիկ Ալեքսանդրը հիվանդանում է խրոնիկ լարինգիտով: Բժիշկները չեն կարողանում ոչնչով օգնել, եւ նա ինքն է գտնում ելքը՝ սկսում է խոսելու եւ ավելի հեշտ շարժվելու նոր ուղիներ փնտրել: Այդ ժամանակ տեղյակ էլ չէր, որ իր առողջական խնդիրների պատճառները գալիս են պարանոցի եւ մարմնի չափազանց լարվածությունից: Շուրջ 50 տարվա աշխատանքային գործունեության ընթացքում Ալեքսանդրը կատարելագործում է իր մեթոդները՝ զուգահեռ պատրաստելով մասնագետներ»: Նա հավելեց նաեւ, որ այս մեթոդն իր մեջ ներառում է երկարատեւ սովորույթների փոփոխություն: Ուսուցիչը գործում է իբրեւ մարզիչ, անընդհատ ուղղորդելով եւ օգնելով արվեստագետին: Մեր զրուցակիցը վստահեցնում է, որ նույնիսկ մասնակի հաջողության դեպքում խնդիրներն իրենց-իրենց սկսում են լուծվել, քանի որ դրանք այլեւս անգիտակցական ջանքեր չեն: Ավելի մատչելի ներկայացնելով ասելիքը, տիկին Բաումանը հայտնեց. «Ալեքսանդրյան մեթոդը ընդգծում է, թե ինչպես պետք է պահել գլուխն ու վիզը՝ մեջքի ու մարմնի մնացած մասերի հարաբերությամբ, երբ բեմում ինչ-որ գործողություն է կատարում արվեստագետը՝ նվագում է, երգում կամ շարժվում»: Սիլվիա Բաումանն ասաց, որ Երեւանում գտնվելու 4 օրերի ընթացքում ինքն օպերային թատրոնի արտիստների հետ կանցկացնի գործնական աշխատանք, փորձարկելով տեխնիկան՝ մկաններ եւ հոդացավ, ձայն եւ շնչառություն, շարժում եւ դիրք, սթրես, գիտակցում, կենտրոնացում ուղղություններով:
Հարցին, թե այս մեթոդը փորձարկվում է միայն երաժիշտների՞ շրջանում, տիկին Բաումանը նախ նշեց, որ տեխնիկան վաղուց կիրառվում է եվրոպական երկրներում, ԱՄՆ-ում, Ճապոնիայում, Ավստրալիայում եւ այլուր, հետո էլ պատասխանեց, թե դրանից օգտվում են դրամատիկ թատրոնի դերասաններն ու մշակույթի այլ ոլորտի ներկայացուցիչներ եւ նույնիսկ սովորական մարդիկ: Ասաց նաեւ, որ շատ հայտնի երաժիշտներ, այդ թվում՝ Ե. Մենուհինը, Փ. Մաքարտնին, Սթինգը, Բրիմը, սըր Ադրիան Բոլթը իրենց բեմական կյանքը զուգահեռել են Ալեքսանդրյան տեսության հետ: