Գարնան, սիրո և նրբագեղության տոնին` Մարտի 8-ին ընդառաջ, տղամարդիկ մտածում են ինչ նվիրել իրենց սիրելի կանանց: Նվերը լինի յուրօրինակ, ցանկալի, և ամենակարևորը սրտանց: «Կարող է գումար չունենաս նվեր գնելու համար, բայց անկեղծ խոսքեր ասելով մայրիկիդ, քույրիկիդ կարող ես մեծ նվեր պարգևել»,- ասում է 18-ամյա Արթուրը: Նա այս իրավիճակում էլ հայտվել է, բայց մտածում է, եթե գումար ունենար, մայրիկին կնվիրեր գեղեցիկ պայուսակ, քույրիկին ապարանջան, իսկ իր հրաշքին, ինչպես ինքն է ասում, գեղեցիկ վզնոց, ու հատուկ իր համար Արթուրի սիրահարված սրտից սիրո քնքուշ խոսքեր: Արթուրը մտածում է, որ տղամարդիկ առանց կանանց՝ գոյություն ունենալ չեն կարող: Արժե նրանց տոն նվիրել ոչ միայն մեկ ամիս, այլ ողջ մի կյանք:
Սամվելը ծիծաղելով ասում է . «Ճիշտ է ծախսը շատ է, բայց լավ օր է, մեր կանանց ուրախացնում ենք»: Նա ծառայում է հայոց բանակում, բայց ընկերները կօգնեն, որ նվերներ հանձնվի իրենց տերերին: «Մայրիկիս կապույտ հոլանդական վարդեր, քույրիկիս օծանելիք, իսկ սիրելլիս՝ թութակ»:
Սիրահարված Կարենը Լալային նվիրելու է իր ամբողջ օրը. «Կարծում եմ դրանից ավելի լավ նվեր չկա սիրած մարդու համար: Միասին կլինենք ամբողջ օրը»,- ասում է նա: Մարտի 8-ին սկսում է ավելի գնահատել, սիրել, ուշադիր լինել մայրիկի հանդեպ: Այդ օրը բոլոր օրերից տարբերվում է մայրիկը:
8-ամյա Հայկը մեկ ամիս առաջ սկսել է գումար հավաքել, որպեսզի նվերներ գնի: Արդեն ունի 1000 դրամ, որոշել է՝ ում է նվեր գնելու. «Մամայիս, հարսիկիս, ու Սուսան տոտային»: Սուսան տոտան թաղամասի խանութի տնօրենն է, ում Հայկը շատ է սիրում: Մայրիկին, հարսիկին ու Սուսան տոտային նվիրելու է ծաղիկեր:
«Առավոտ երիտասարդականը» շնորհավորում է բոլոր կանանց և աղջիկներին Կանանց միջազգային օրվա` Մարտի 8-ի առթիվ` մաղթելով առողջություն, անսահման սեր, կանացի երջանկություն ու բարձր տրամադրություն:
Մելանյա Հարությունյան
