Ձմեռն արդեն անցյալում է, սակայն մենք նոր-նոր փորձում ենք վայելել գարնան ջերմությունն ու արևի փայլը: Իհարկե պետք չէ ժամանակից շուտ ուրախանալ և մտածել, որ արդեն ձերբազատված ենք հիվանդություններից ու մրսածությունից: Ինչպես նշում է թերապևտ Արմինե Կարապետյանը` Հայաստանում գրիպի ակտիվացման շրջանը սկսվում է հոկտեմբերից և տևում մինչև մայիս: «Ես արդեն չեմ հիշում` երբվանից եմ գրիպ, հուսանք, գարնան գալուստը կփրկի»,- բողոքում է Քրիստինեն, ով, ինչպես ինքն է ասում, արդեն մի քանի օր է` ջերմությամբ պառկած է: Գրիպը վիրուսային ինֆեկցիոն հիվանդություն է: Թերապևտի խոսքով, հիվանդության աղբյուրը գրիպով հիվանդ մարդն է, ով վիրուսը փոխանցում է առաջին 3-7 օրվա ընթացքում: Վիրուսն արտադրվում է խոսելիս, հազալիս, փռշտալիս, թքի միջոցով, իսկ ինֆեկցիան փոխանցվում է օդակաթիլային ճանապարհով: Ա. Կարապետյանի մեկնաբանմամբ, գրիպի նկատմամբ բնակչության ընկալունակությունը խիստ բարձր է. հիվանդանում են բոլոր տարիքի մարդիկ, բացառությամբ մինչև 6 ամսական երեխաները, որոնք օժտված են պասիվ իմունիտետով, իսկ ապաքինումը տևում է 1-2 շաբաթ:
«Գրիպը պայմանավորված է մի շարք հանգամանքներով` եղանակների ցրտելը, փակ տարածքներում բնակչության շփումը, երբ սենյակները չեն օդափոխվում, պատուհանները չեն բացվում: Մեկ հիվանդի առկայությունը արդեն իսկ կարող է գրիպի պատճառ լինել, քանի որ հիվանդությունը տարածվում է շփման միջոցով»,- հավելում է բժշկուհին: Նրա խոսքով` հիվանդությունը կարող է ուղեկցվել բարձր ջերմությամբ (ջերմությունը կարող է պահպանվել 2-5 օր), ընդհանուր թուլությամբ, գլխացավով, մկանային ցավերով, հարբուխով, հազով, քթի խցանումով, արցունքահոսությամբ… «Ամենավարակիչ շրջանը հիվանդության սկիզբն է, և հենց այդ շրջանում հիվանդի մոտ գտնվողների վարակվելու հավանականությունը շատ ավելի մեծ է: Վարակվելու վտանգ չի սպառնա, եթե հիվանդի մոտ հազ, փռշտոց, քթարտադրություն այլևս չնկատվի»,- նշում է Ա. Կարապետյանը` ավելացնելով, որ գրիպից պաշտպանվելու համար նախևառաջ չպետք է մոտիկից շփվել գրիպով մարդկանց հետ, պետք է պահպանել անձնական հիգիենայի կանոնները, հատկապես հաճախակի լվանալ ձեռքերը օճառով:
Եթե հիվանդը ժամանակին չդիմի բժշկի եւ չստանա համապատասխան բուժում, բժշկուհու խոսքով, գրիպը կարող է բարդություններ առաջացնել. «Հաճախ կարող է հանգեցնել քիթ-կոկորդ-ականջ օրգանների բորբոքման, ինչպես նաև` թոքաբորբի, բրոնխիտի»:
Գրիպը համարվում է ամենաթեթև և ամենածանր հիվանդությունը, որից խուսափելու համար, բժշկուհին տվեց մի քանի խորհուրդ.
•խուսափել հիվանդների հետ շփումից (իսկ արդեն հիվանդներին` մնալ տանը և դրանով վարակի աղբյուր չդառնալ նաև շրջապատի համար),
•հնարավորին չափ շատ հեղուկ օգտագործել,
Ի վերջո` հետևել առողջ ապրելակերպին: •ուտել վիտամիններով հարուստ սնունդ,
•հաճախակի օդափոխել փակ տարածքները,
•չզբաղվել ինքնաբուժմամբ` դիմել մասնագետի,
•պահպանել հազի և փռշտալու էթիկայի կանոնները,
•հագնվել եղանակին համահունչ…
Ռուզան Ասատրյան
