«Շատ դեպքերում ունենում ենք սահմանադրական իրավունք, բայց դրան համարժեք պարտականություն և պատասխանատվություն համապատասխան պետական մարմնի համար սահմանված չէ»,-այսօր Կոտայքի մարզպետարանում սահմանադրական բարեփոխումների հայեցակարգին նվիրված քննարկման ժամանակ սահմանադրական բարեփոխումների անհրաժեշտությունը հիմնավորելով՝ այսպիսի կարծիք հայտնեց ՀՀ գլխավոր դատախազ, ՀՀ նախագահին կից սահմանադրական բարեփոխումների մասնագիտական հանձնաժողովի անդամ Գևորգ Կոստանյանը:
Ըստ նրա՝ սահմանադրական բարեփոխումների անհրաժեշտությունը ակնառու է:
Պարոն Կոստանյանն ընդգծեց այն հանգամանքը, որ հայեցակարգը պատրաստվել է՝ հաշվի առնելով երկրի կառավարման համակարգին և անձի հիմնական իրավունքներին վերաբերող հարցերը:
Պետական կառավարման համակարգի մասին խոսելով՝ դատախազը նկատեց. «Մենք կարիք ունենք մեր պետական կառավարման համակարգը բերել մի իրավիճակի, որ հանգեցնենք կուսակցական քաղաքական կոլեկտիվ պատասխանատվության, հատկապես մեր պետական կառավարման ձևի և պետական կառույցների գործունեության, քաղաքական կուսակցական պատասխանատվության բարձրացնելուն, որ համակարգը կառուցված չլինի անձերի վրա»:
Կառավարման համակարգը Գևորգ Կոստանյանը բնութագրեց որպես «անձի շուրջ մասնավորեցված» ու շարունակեց. «Սա չի հանգեցնում կուսակցական համակարգի զարգացմանը և կոլեկտիվ պատասխանատվության առաջացմանը»:
Կարդացեք նաև
ՀՀ գլխավոր դատախազն ընդգծեց, որ սահմանադրական բարեփոխումների նպատակն է պատասխանատվությունը դնել ոչ թե անձի, այլ կուսակցության վրա: Այսինքն՝ եթե տվյալ նախարարը թերանում իր աշխատանքում, ապա պատասխանատվությունը ոչ թե պիտի ընկնի անձի, այլ հենց կուսակցության վրա: Իսկ եթե այդ կուսակցությունը չի կարողանում այդ պատասխանատվությունը կրել, դառնում է ընդդիմադիր:
ՀՀ նախագահին կից սահմանադրական բարեփոխումների մասնագիտական հանձնաժողովի անդամ Վարդան Պետրոսյանը նշեց, որ 1995-ի Սահմանադրությունը իշխանակենտրոն էր և դրա հիմքում մարդը չէր, իսկ 2005-ի սահմանադրական փոփոխությունները չլուծեցին այդ հիմնական խնդիրները:
Պարոն Պողոսյանը շեշտեց, որ «Մենք մեր հայեցակարգի նախագծում հատուկ անդրադարձել ենք ու նշել, որ քաղաքական ընդդիմության իրավունքների ընդլայնման կարիք կա և հետագա վերամշակման փուլում այդ դրույթները ավելի կոնկրետ իր արտահայտությունը կգտնեն, որ քաղաքական ընդդիմությունը միշտ կարողանա իր ձայնը հասցնել ինչպես իշխանությանը, այնպես էլ հանրությանը»:
Վարդան Պողոսյանը նշեց. «Եթե կառավարության ծրագիրը հավանության չի արժանանում ԱԺ-ի կողմից, ապա ԱԺ-ն ենթակա է լուծարման: Նույնը կարող է կատարվել, եթե անցում կատարվի խորհրդարանական համակարգի: Որ ԱԺ ընտրությունները տեղի ունենան երկու փուլով, ինչպես այժմ նախագահի ընտրությունները, որին մասնակցում են առավել ձայներ ստացած երկու թեկնածուները: Նմանատիպ գաղափար քննարկել ենք նաև ԱԺ ընտրությունների պարագայում, որտեղ երկրորդ փուլին կմասնակցեն այն կուսակցությունները և դաշինքները, այդպիսով կձևավորվի քաղաքական մեծամասնություն»:
Տաթև ՀԱՐՈՒԹՅՈՒՆՅԱՆ
