Այսօր առավոտյան Բաղրամյան պողոտա այցելած ոստիկանապետ Վլադիմիր Գասպարյանն ակնարկել է, թե ակցիայի հետեւում գերտերություններ են կանգնած եւ «մենք սրա ու նրա խելքին պետք է չընկնենք»:
Aravot.am-ը «Ազգային անվտանգություն» կուսակցության նախագահ Գառնիկ Իսագուլյանին, որն այսօր էլ եկել էր Բաղրամյան պողոտա, հարցրեց, թե երկրի գլխավոր իրավապահներից մեկը` ոստիկանապետն իրավունք ունի՞ առանց փաստեր ներկայացնելու նման հայտարարություն անել: Պարոն Իսագուլյանը Վլադիմիր Գասպարյանին հանգստացրեց` ասելով, որ ինքն արդեն քանի օր է Բաղրամյան պողոտա է այցելում եւ վստահորեն կարող է ասել, որ երիտասարդների շարժման հետեւում ոչ մի արտաքին ուժ կանգնած չէ, որ սա սոցիալական ընդվզում է. «Ուղղորդում չկա, միանշանակ, ազգային անվտանգության ծառայության ղեկավարը նման բան ասե՞լ է, ոչ, ուրեմն` այդ կարգի խնդիրներին ամենաքաջատեղյակը լինում են ազգային անվտանգության ծառայության աշխատակիցները, ես կարծում եմ ուղղակի տեսակետ է, որ հայտնել են եւ այս ամենի հետ կապ չունի»:
Մեր այն հարցին էլ, թե երեկ վարչապետը հայտարարեց, որ էլեկտրաէներգիայի թանկացման որոշումն ուժի մեջ է մնալու եւ որ որոշումը չի փոխվելու, Գառնիկ Իսագուլյանն ասաց, որ Հովիկ Աբրահամյանն իր կարծիքն է հայտնել: Մեր այն դիտարկմանը, թե այդ հայտարարությունը կառավարության նիստում է հնչել, պարոն Իսագուլյանն ասաց. «Մենք սովոր ենք լսել մեր պաշտոնյաներից մտքեր, արտահայտություններ, որոնք օրենքների, Սահմանադրության հետ բացարձակ կապ չունեն»: Գառնիկ Իսագուլյանը հույս հայտնեց, որ նախահագը երբ վերադառնա Բրյուսելից, որոշումը կվերանայվի:
Գառնիկ Իսագուլյանի մեկնաբանությունները` տեսանյութում
Կարդացեք նաև
Պարոն Իսագուլյանը նաեւ մեկնաբանեց երեկվա միջադեպը , երբ ակցիայի մասնակիցների մեջ հայտնվել են ալկոհոլ օգտագործած մարդիկ, ինչն արժանացել էր Երեւանի փոխոստիկանապետ Վալերի Օսիպյանի ուշադրությանը:
Գառնիկ Իսագուլյանն ասաց, որ ականատես է եղել, թե ինչպես «Նիվա» մակնիշի մեքենայով ալկոհոլ են բաժանել, որոնք սակայն «բացարձակ կապ չունեին» ակցիայի հետ. «Կազմակերպիչները զգուշացրին ոստիկաններին, որ այսպիսի բան է տեղի ունենում, ցավոք սրտի, ոստիկանները, որ պարտավոր էին անմիջապես միջոցառումներ ձեռնարկել, ասացին, որ մասնավոր է, իրենց սեփական ապրանքն է»:
Լուսինե ԲՈՒԴԱՂՅԱՆ
