«Ավրորա» մրցանակի ընտրող հանձնաժողովն այսօր Impact Hub-ի սրահում հայտարարեց մրցանակի դափնեկրի չորս հավակնորդների անունները` Մարգարիտ Բարանկիցե, Թոմ Քաթինա, Սայիդա Ղուլամ Ֆաթիմա եւ Հայր Բերնարդ Կինվին:
«Մրցանակը շնորհվում է ցեղասպանությունը վերապրածների անունից` որպես երախտիքի նշան` իրենց փրկողներին: Խոսքն այն անձանց մասին է, որոնք նվիրում են ցուցաբերել եւ ազդեցիկ փոփոխությունների հասել: Թեկնածուներից միայն մեկը կդառնա դափնեկիր: Նրան կշնորհվի 100․000 ԱՄՆ դոլար: Բացի այդ, եւս 1.000.000 ԱՄՆ դոլար կհատկացվի, որը մրցանակակիրն իր հայեցողությամբ կնվիրաբերի մարդասիրական որեւէ կազմակերպության: Ի դեպ, թեկնածուներն արդեն որոշել են` դափնեկիր լինելու դեպքում որ կազմակերպությանն են հատկացնելու դրամական պարգեւը: Այդ մասին կհայտարարվի առաջիկայում»,-լրագրողներին տեղեկացրեց «100 կյանք» եւ «Ավրորա» մրցանակ նախաձեռնության հաղորդակցության հարցերով տնօրեն Արմինե Աֆեյանը:
Նրա փոխանցմամբ` «Ավրորա» մարդասիրական համաշխարհային մրցանակն ամեն տարի շնորհվելու է նրան, ով անձնվիրաբար օգնում է մարդկանց։ Դափնեկիրները ճանաչման են արժանանալու իրենց արարքների բացառիկ ազդեցության եւ նշանակության համար։
Մրցանակի հավակնորդներից Մարգարիտ Բարանկիցեն աշխատում է Բուրունդիի «Խաղաղության Տուն» խնամքի տանը եւ REMA հիվանդանոցում: Բուրունդիի քաղաքացիական պատերազմի տարիներին նա հազարավոր կյանքեր է փրկել՝ խնամելով որբերին ու փախստականներին։ Նա փրկել է, ընդհանուր առմամբ 30 000 երեխայի եւ 2008 թվականին հիվանդանոց հիմնել, որտեղ մինչ օրս բժշկական օգնություն է ստացել 80,000 մարդ։
Կարդացեք նաև
Թոմ Քաթինան էլ Սուդանի Նուբա լեռներում գտնվող «Գթության Մայր» հիվանդանոցի միակ բժիշկն է, որը սպասարկում է տարածաշրջանի 500,000 բնակչի: Չնայած Սուդանի կառավարության կողմից տարածքի բազմակի ռմբակոծումներին, բժիշկ Քաթինան մարդկանց հասանելի լինելու համար ապրում է հիվանդանոցի նկուղում:
Սայիդա Ղուլամ Ֆաթիման իր կյանքը նվիրել է պարտքի դիմաց ֆիզիկական շահագործման ենթարկվողներին փրկելուն՝ փորձելով վերացնել մերօրյա ստրկության տեսակներից մեկը։ Ֆաթիման Պակիստանի «Կախյալ շահագործվողների ազատագրության ճակատի» ջանքերով փրկել է աղյուսի թրծման գործարաններում պարտքի դիմաց բռնությամբ աշխատող հազարավոր մարդկանց, այդ թվում` 21,000 երեխայի։
Հայր Բերնար Կինվին հոգեւորական է դարձել 19 տարեկանում, երբ երկարատեւ բռնությունների ու հիվանդության հետեւանքով կորցրել է հորն ու չորս քույրերին։ Կենտրոնաաֆրիկյան Հանրապետության Բոսսեմտելե քաղաքում նա գլխավորել է տեղի կաթոլիկ դպրոցը, եկեղեցին եւ Հովհաննես Պողոս Բ Պապի անունը կրող հիվանդանոցը։ Սակայն 2012 թվականին Կենտրոնաաֆրիկյան Հանրապետությունում մուսուլմանական Սելեկա դաշինքի ապստամբների եւ Հակաավտոմատավորների քրիստոնյա աշխարհազորի միջեւ (Anti-balaka) քաղաքացիական պատերազմ է բռնկվում։ Տեղի ունեցող բռնությունների ընթացքում Հայր Կինվին ապաստարան ու բժշկական օգնություն է տրամադրել հակամարտության երկու կողմերի տուժածներին՝ հետապնդումից ու մահից փրկելով հարյուրավոր մարդկանց։
Նշենք, որ «Ավրորան» դափնեկրին կշնորհի ընտրող հանձնաժողովի համանախագահ Ջորջ Քլունին` ապրիլի 24-ին, Երեւանում: «Մենք` հայերս, հաղթած ազգ ենք: Կարեւոր է, որ աշխարհը եւս հասկանա դա: Մեզ փորձեցին ոչնչացնել, բայց մենք հաղթեցինք: Այս փիլիսոփայության հիմնաքարը շնորհակալ լինելն է: Շնորհակալ ենք այն մարդկանց, որոնք օգնության ձեռք մեկնեցին մեզ եղեռնի տարիներին եւ նրանց, ովքեր այսօր էլ մարդկային կյանքեր են փրկում: Համոզված ենք, որ Հայաստանը կարող է դառնալ աշխարհի մարդասիրական կենտրոններից մեկը»,-ասաց «100 կյանք» եւ «Ավրորա» մրցանակ նախաձեռնության գլխավոր տնօրեն Արման Ջիլավյանը:
Հավելենք, որ «Ավրորա» մրցանակը հիմնել են «100 կյանք» նախաձեռնության հիմնադիրները՝ ի երախտագիտություն նրանց, ովքեր Հայոց ցեղասպանության տարիներին փրկության ձեռք մեկնեցին հայերին:
Լուիզա ՍՈՒՔԻԱՍՅԱՆ
