Այսօր մեկնարկած ԱԺ քառօրյա հերթական նիստի օրակարգի հաստատումից առաջ ԲՀԿ խմբակցության պատգամավոր Տիգրան Ուրիխանյանը պնդեց, թե իրեն հանիրավի կերպով զրկել են վերջերս հայ-ռուսական միջխորհրդարանական հանձնաժողովի 27-րդ նիստի աշխատանքներին մասնակցելու հնարավորությունից: Հարցի պարզաբանման համար «Առավոտ»-ը դիմեց Հայ-ռուսական միջխորհրդարանական հանձնաժողովի համանախագահ, ԱԺ փոխնախագհ Հերմինե Նաղդալյանին.
-Տիկին Նաղդալյան, արդյո՞ք արդարացի են պատգամավորի դժգոհությունները այս առիթով և հետաքրքիր է իմանալ ինչ սկզբունքով է որոշվում նիստին մեկնող պատգամավորների ցանկը.
– Առաջին անգամը չէ, որ գործուղումների ժամանակ նման խոսակցություններ են առաջանում պատգամավորների շրջանում: Ինչևէ, Հայ– ռուսական միջխորհրդարանական հանձնաժողովի հետ կապված հետևյալ իրավիճակը ունենք՝ հանձնաժողովի 20 պատգամավորի քվոտայի դիմաց՝ ցուցակագրված են 27 պատգամավոր, և, բնականաբար, բոլորն ունեն ցանկություն մասնակցելու աշխատանքներին, հատկապես, երբ նիստերը դրսում են անցկացվում: Իսկ մենք գիտենք, որ Ազգային ժողովի բյուջեի հնարավորությունները սուղ են, և, որպես կանոն, չեն համապատասխանում մեր պատգամավորների ցանկություններին: Արդյունքում, ռուսական կողմի հետ պայմանավորվածության համաձայն, գործուղվում են 12-14 հոգի, քանզի այստեղ էլ կան պարիտետի պահմանման խնդիրներ: Այս անգամ հանձնաժողովի 27-րդ նիստի աշխատանքներին մասնակցել են ցուցակում ընդգրկված 27 պատգամավորից 13-ը, ինչպես նշեց Ազգային ժողովի նախագահը: Ընտրված է եղել այնպիսի սկզբունքով, որ բոլոր խմբակցությունների անդամները մասնակցեն՝ Ժառանգությունից, ՀԱԿ-ից, Օրինաց երկրից, ՀՀԿ-ից, Դաշնակցությունից, Բարգավաճ Հայաստանից:
Կոնկրետ Բարգավաճ Հայաստան խմբակցությունը ներկայացված է եղել խմբակցության ղեկավարի մակարդակով, ով շատ ակտիվ մասնակցել է նիստի աշխատանքներին և օրակարգում եղած բոլոր հարցերի վերաբերյալ ներգրավված է եղել քննարկումներին, ելույթներ ունեցել, ինչպես մնացած բոլոր պատգամավորները, և որպես հանձնաժողովի համանախագահներ՝ ես և պարոն Ռիժկովը մեր գոհունակությունը այդ առիթով հայտնել ենք:
Կարդացեք նաև
–Ի՞նչ հաճախությամբ են հրավիրվում հայ-ռուսական միջխորհրդարանական հանձնաժողովի նիստերը և ինչպե՞ս են տարվում աշխատանքները:
– Ընդհանրապես հայ-ռուսական միջխորհրդարանական հանձնաժողովը մեր խորհրդարանի ամենաակտիվ աշխատող միջխորհրդարանական ձևաչափերից մեկն է: Աշխատում է սիստեմատիկ, համակարգված ռեժիմով՝ տարին երկու անգամ նիստեր անցկացնելով՝ ամռանը Ռուսաստանում, աշնանը՝ Հայաստանում: Քննարկվում է միջխորհրդարանական ձևաչափում հայ-ռուսական համագործակցությանն առնչվող հարցերի լայն սպեկտր:
Կցանկանայի նշել, որ շատ ակտիվ է ընթացել նաև հանձնաժողովի հերթական ՝ 27-րդ նիստը, բավական հագեցած օրակարգով: Առաջին մասում քննարկվել է Լեռնային Ղարաբաղում տիրող իրավիճակը, որի ընթացքում հայ խորհրդարանականները հանդես են եկել ելույթներով` գլխավորապես բարձրացնելով զինադադարի ռեժիմի ամրապնդմանն ուղղված համապատասխան միջոցառումների անհետաձգելիության և վստահության մթնոլորտի ստեղծմանն առնչվող խնդիրները, ռուսաստանցի գործընկերներին փոխանցելով իրենց մտահոգությունները: Երկրորդ մասում օրակարգի գլխավոր թեման առնչվել է հայ-ռուսական տնտեսական կապերի զարգացման հնարավորություններին և համագործակցությանը:
– Պարոն Ուրիխանյանը , այնուամենայնիվ, նշեց, որ նախապատրաստել էր կարևոր հարցադրումներ, որոնք պետք է բարձրացներ նիստի ընթացքում, արդյո՞ք այս առումով հանձնաժողովը բաց չունեցավ.
– Ինչ վերաբերում է իր առաջադրած հարցերին, ապա պետք է նշեմ, որ հարավ-կովկասյան երկաթուղու, թե՛ ներհայաստանյան և թե՛ արտաքին խնդիրներին առնչվող հարցերը ՝ աբխազական և վրացական խնդիրների վերաբերյալ և այլն, տարիներ շարունակ եղել է ուշադրության կենտրոնում, և այդ հարցերը մշտապես քննարկվել ու բարձրացվել են մեր խորհրդարանականների շնորհիվ, Վոլոդյա Բադալյանի ղեկավարությամբ գործել և այսօր էլ շարունակում է իր աշխատանքները՝ հատուկ երկաթուղու հարցերով ստեղծված աշխատանքային խումբը: Այսինքն՝ այդ հարցերը մշտապես եղել են հայ-ռուսական միջխորհրդարանական հանձնաժողովի քննարկման առարկա դեռևս այն ժամանակվանից, երբ որոշ մեր կոլեգաները անգամ պատգամավոր չէին հանդիսանում: Հանձնաժողովը ունեցել և այժմ էլ ունի ռուսական կողմի հետ պայմանավորվածություն մի շարք հարցերի շուրջ, որոնք մշտապես խորհրդարանականների ուշադրության կենտրոնում պետք է մնան, դրանցից մեկը՝ ՌԴ-ի և ՀՀ-ի միջև տրանսպորտային հաղորդակցության հարցն է:
Ինչ վերաբերում է տնտեսական համագործակցության խորացման և փոքր ու միջին բիզնեսի համար խոչընդոտների վերացման ու համագործակցության հնարավորությունների ընդլայնմանը, ապա դա նույնպես մշտապես մեր պատգամավորների ուշադրության կենտրոնում գտնվող հարցերից է, այդ թվում և՝ իմ, Վարդան Այվազյանի և այլոց, և որոնց վերաբերյալ նույնպես ստեղծված է հատուկ աշխատանքային խումբ:
Այն չարչրկված թեմայի առիթով, թե պատգամավորները ցանկություն ունեն, բայց նրանցից ոչ բոլորն են կարողանում մասնակցել արտագնա նիստերի աշխատանքներին, ապա պետք է նշեմ, որ մենք աշխատում ենք առաջնորդվել այնպիսի սկզբունքով, որ նույն մարդիկ անընդհատ չլինեն, այլ մյուսներին ևս հնարավորություն տրվի մասնակցելու:
–Իսկ այդ հարցով Ձեր գործընկերները Ձեզ դիմե՞լ են:
– Գործընկերներս ինձ մոտեցել և հաղորդել են մեկնելու ցանկության մասին, բայց ցավում եմ, դա եղել է արդեն որոշումը ընդունելուց հետո, ուշացած ժամկետներում, որի մասին իրենց տեղեկացվել է: