ԿԸՀ նախագահ Տիգրան Մուկուչյանն այսօր ԿԸՀ նիստից հետո լրագրողների հետ զրույցում ասաց, որ «Ծառուկյան» դաշինքի այն պատգամավորների ինքնաբացարկի աղմկահարույց դիմումները, որոնք ներկայացված են եղել իրենց, բոլորը եղել են նոտարական վավերացմամբ:
Ավելի ուշ ԿԸՀ-ն ցուցադրեց այդ դիմումները լրագրողներին:
Հարցին՝ բոլորը նույն նոտա՞րն էր հաստատել՝ Տիգրան Մուկուչյանը պատասխանեց, որ չի ստուգել:
Կարդացեք նաև
ԿԸՀ նախագահն ասաց, որ կոռեկտ չէր ԿԸՀ-ում հարցնել, թե ինչու են հրաժարվել իրենց մանդատներից, որովհետեւ դա նրանց իրավունքն է:
Ինչպես արդեն հայտնել ենք, «Ծառուկյան» դաշինքից ինքնաբացարկի դիմումը հետ վերցրած 12 թեկնածուներից 4-ին մանդատ չհասավ: Տիգրան Մուկուչյանը բացատրեց, թե ինչու այդպես եղավ. «Եթե տարածքային ընտրական ցուցակից մանդատ են ստանում, բնական է, որ այնտեղից մանդատ է ստանում ավելի մեծ քվե ստացած թեկնածուն: Եթե երկու թեկնածու ներկայացրել էր ինքնաբացարկի վերաբերյալ դիմումներ, հետո չեղյալ են համարում իրենց դիմումները եւ այնտեղից էլ կուսակցությունն ունի 1 մանդատ, ապա բնական է, որ այդ մեկ մանդատը կստանա այն թեկնածուն, ով ավելի շատ քվեներ ունի: Եվ կային թեկնածուներ, որոնք համապետական ցուցակում էին, իրենց համարները ավելի ուշ էր, հետեւաբար չեն ստանում»:
Հռիփսիմե ՋԵԲԵՋՅԱՆ
