Յուրաքանչյուրս ունենք պասուց տոլմայի մեր փորձված բաղադրատոմսը, եւ թերեւս մեկը մյուսից համեղ են: Ավելին, գուցե ամեն անգամվա պատրաստածը նման չի նախորդ անգամվա պատրաստածին՝ կախված նրանից, թե ինչով եք լցոնել այս անգամ, չէ՞ որ դժվար է պասուց տոլմայի համար շատ հստակ, գրամ-գրամ բաղադրատոմս ասել, աչքաչափը այստեղ գլխավոր դերերում է: Սակայն կան որոշակի կանոններ, որոնք պետք է պահպանել: Առաջարկում եմ պասուց տոլմայի իմ տարբերակը:
Անհրաժեշտ մթերքները
Չոր լոբի- 1 բաժակ (եթե ունեք տարբեր գույներ լոբիներ, կարող եք յուրաքանչյուրից մեկական բաժակ դնել)
Սիսեռ-1 բաժակ
Կարդացեք նաև
Ոսպ-1 բաժակ (եթե ունեք կանաչ եւ կարմիր սիսեռներ, կարող եք յուրաքանչյուրից մեկական բաժակ վերցնել)
Բլղուր-1-2 բաժակ (հնարավորության դեպքում վերցրեք միջին չափի բլղուր)
Չոր ոլոռ- 1 բաժակ (սա պարտադիր չէ, եթե ունեք՝ 1 բաժակ դեղին կամ կանաչ չոր ոլոռ վերցրեք, եթե ոչ՝ պետք չէ)
Գլուխ սոխ-2-3 գլուխ
Լեչո-0,5 կգ տարայով
Լոլիկ սեփական հյութի մեջ- 1 բաժակ
Տոմատի մածուկ-2-3 ճաշի գդալ
Պղպեղի մածուկ-2 ճաշի գդալ (եթե չունեք՝ հոգ չէ)
Թարմ կանաչի-1 խոշոր կապ
Չորացրած ռեհան-1 լիքը բուռ
Կանեփի սերմ-0,5 բաժակ (սա պարտադիր բաղադրիչ չէ, սակայն շատ է սազում պասուց տոլմային, ես միշտ ավելացնում եմ)
Աղացած կարմիր պղպեղ – 1 ճաշի գդալ քաղցր եւ 1 թեյի գդալ կծու
Սեւ պղպեղ, աղ- ըստ ճաշակի
Բուսական յուղ-1 բաժակ
Սեւ սալորաչիր-10-15 հատիկ
Սերկեւիլ-1 հատ
Թթու կաղամբ
Պատրաստման եղանակը
Լոբիները, սիսեռը, ոլոռը եւ ոսպը պետք է նախապես լավ լվանալ, թրջել եւ եփել: Ես մեկ օր առաջ լվանում եմ լոբազգիները, թրջում եմ ամբողջ գիշերվա ընթացքում, առավոտյան եփում, իսկ երեկոյան փաթաթում տոլման: Կարող եք վերցնել նաեւ պատրաստի պահածոյացված լոբիներ եւ սիսեռ, այդ դեպքում ժամանակի կորուստ չեք ունենա: Բլղուրը պետք չէ թրջել, պարզապես լավ լվացեք ցանցի մեջ: Կանեփը նույնպես լվացեք:
Սոխը մաքրեք, լվացեք, մանր կտրատեք եւ առատ յուղի մեջ սոխեռած արեք: Երբ սոխը ոսկեգունի, ավելացրեք տոմատի եւ պղպեղի մածուկները, չոր ռեհանը, աղացած պղպեղները, ապա՝ լեչոն: Թողեք մի փոքր էլ եփվի, անջատեք, թողեք սառչի:
Մեծ թասի մեջ լցրեք բոլոր նախապես եփած լոբազգիները, ոսպը, բլղուրը, կանեփը, մանր կտրատած կանաչիները: Ավելացրեք սոխեռածը, լավ խառնեք: Համտեսեք, եթե զգաք աղի կարիք կա, ավելացրեք: Եթե զգաք բուսական յուղի կարիք կա, դա էլ ավելացրեք:
Կաղամբի տերեւները լցոնեք միջուկով: Մեծ կաթսայի հատակին մի քանի տերեւ դրեք, տոլմաները շարեք վրան: Յուրաքանչյուր շերտի վրա դրեք կտրատած սերկեւիլ եւ մի քանի սալորաչիր, ինչպես նաեւ՝ մի քանի գդալ լեչո կամ սեփական հյութի մեջ լոլիկ:
Երբ բոլոր տոլմաները շարված կլինեն, վրան ավելացրեք 1-1,5 բաժակ տոմատաջուր, տոլմաների վրա ափսե շուռ տվեք, ծածկեք կաթսան կափարիչով եւ դրեք սկզբում միջին կրակին, հենց եռա, ցածրացրեք կրակը եւ ամենամարմանդ կրակի վրա եփեք 45-60 րոպե:
Պասուց տոլման մատուցում են սառը վիճակում՝ որպես սառը նախուտեստ, սակայն եթե չեք համբերում, կարող եք տաք-տաք էլ ուտել:
Բարի ախորժակ:
Պատրաստման մանրամասները դիտեք տեսանյութում:
Պատրաստեց Մելանյա ԲԱՐՍԵՂՅԱՆԸ
