Վազգեն Սարգսյանի անվան ռազմական համալսարանի դիմաց այսօր բողոքի ցույց են անում մի խումբ ծնողներ՝ պաշտպանության նախարարությունից պահանջելով անվտանգության երաշխիքներ տալ իրենց որդիների համար, որոնք այս պահին ժամկետային զինծառայության մեջ են: «Մեր պահանջն է, որպեսզի մեր երեխաները չգնան Արցախ, որովհետեւ ճանապարհն անվտանգ չէ: Երաշխիք չկա՝ մեր երեխաները կհասնե՞ն Արցախ, թե՞ ոչ: Թող մեկը գա նախարարությունից եւ ասի, որ ՀՀ զորամասեր են տանելու: Թող ասեն զորամասի համարը: Արցախ հասնելու համար որեւէ երաշխիք չկա, հրամանատարներից որեւէ մեկը չի ասել, որ մեր երեխաների անվտանգությունը երաշխավորում է»,-հայտարարեց ժամկետային զինծառայողներից մեկի ծնողը:
Նա հավելեց. «Մեր երեխաները ժամկետային զինծառայողներ են: Արձակուրդից եկել էին, պետք է ամսի 28-ին գնային, ադրբեջանցիները չէին թողել, դրա համար երեխաներին բերեցին այստեղ՝ որպես կացարան, որտեղ կմնան: Եթե տասը կամ քսան օր առաջ վտանգավոր էր, հիմա ո՞նց է անվտանգ: Խոսակցություն կա, որ տանում են Գորիս, տասը հոգանոց խմբերով զգեստափոխում են եւ անցկացնում Արցախ: Մոտ հարյուր հիսուն հոգի: Հիմա էլ ասում են, թե Արցախ չեն տանում, այլ Գորիս: Ինչո՞ւ են Գորիս տանում»:
Կարդացեք նաև
Մեկ այլ ծնող էլ բարձրաձայնեց, որ այս գիշեր ավտոբուսներ են կանչվել համալսարանի տարածք, զինծառայողներին էլ հրահանգել են նստել. «Որտեղից եկել են, այդտեղ են տանում: Երեք ժամ է այստեղ ենք, որեւէ մեկը չի բարեհաճում գալ ու ասել, որ 250 զինվորներն անվտանգ տեղ են հասնելու»: Ցույցի մեկ այլ մասնակից էլ հարցադրում արեց՝ ինչո՞ւ են զինվորներին ավտոբուսներում ուղեկցող հրամանատարները քաղաքացիական հագուստներով. «Որ ճանապարհին մի բան լինի՝ թողնեն փախնե՞ն, զինվորներն էլ գերի՞ ընկնեն: Այդքան դուխ ունեն՝ թող զինվորի հագուստ հագնեն»: Մի տղամարդ էլ շեշտեց՝ համալսարանում իրենց որդիներին սպառնալիքով են տանում Արցախ ծառայելու:
Լուիզա ՍՈՒՔԻԱՍՅԱՆ
